Reagim i ashpër ndaj heqjes së portretit të Rugovës nga Presidenca

Ish-veprimtari i Lidhjes Demokratike të Kosovës, Saim Tahiraj, ka shfaqur shqetësim dhe indinjatë të thellë lidhur me informacionet për heqjen e fotografisë së ish-presidentit historik Ibrahim Rugova dhe të Deklaratës së Pavarësisë nga mjediset e Presidencës, ku tashmë është vendosur portreti i presidentes aktuale, Justina Shiroka-Pula. Tahiraj e ka vënë në shënjestër këtë zhvillim, duke theksuar se institucioni i Presidencës duhet të mishërojë unitetin dhe të jetë përfaqësues i barabartë i të gjithë qytetarëve, pa asnjë dallim të natyrës politike apo ideologjike. Sipas tij, fillimisht kishte pasur optimizëm dhe gëzim për zgjedhjen e Shiroka-Pulës në krye të shtetit, jo vetëm sepse i jepej fund një ngërçi të gjatë politik, por edhe për faktin se drejtimi i vendit i besohej sërish një gruaje, e cila mbante edhe detyrën e kryetares së AASHK-së. Megjithatë, ai vlerëson se hapi për të larguar simbolet e Rugovës dhe dokumentin themeltar të shtetësisë përbën një sinjal negativ për integritetin e institucionit më të lartë të vendit. “Kur më në fund, pas një maratone politike, u zgjodh Presidentja e Kosovës, Justina Shiroka-Pula, u gëzuam të gjithë. Së pari, sepse përfundoi kjo maratonë politike; së dyti, sepse edhe një herë u zgjodh një grua në krye të shtetit; dhe së treti, sepse u zgjodh një kryetare e AASHK-së. Menduam se do të ishte politikisht e paanshme dhe një presidente që do t’i përfaqësonte të gjithë qytetarët e Kosovës në mënyrë të barabartë, pa dallime politike e ideologjike. Një nismë e saj për ta larguar fotografinë e Presidentit historik, Ibrahim Rugova, dhe Deklaratën e Pavarësisë nga Presidenca, është një ogur i zi për vetë institucionin që ajo përfaqëson: Presidencën e Republikës së Kosovës”, është shprehur Tahiraj. Në vijim të reagimit, ai ka ngritur dyshime se një vendim i tillë dëshmon anshmëri dhe e rreshton shefen e shtetit përkrah një krahu të caktuar politik. “Një veprim i tillë na tregon se Presidentja e Kosovës nuk po dëshmon paanshmëri politike, por po identifikohet me atë vijë politike, e cila edhe para luftës, e sidomos gjatë luftës, me armë në dorë kërkonte largimin e fotografisë së Presidentit Rugova nga shtabet, ku ushtarët dhe komandantët e mbanin me krenari. Pikërisht këtu ishte pikënisja e dallimeve të mëdha ideologjike, të cilat na çuan deri te vrasjet politike, që edhe sot mbeten një plagë e rëndë në shoqërinë tonë”, ka deklaruar ai. Në fjalën e tij, Tahiraj ka përmendur gjithashtu zhvillimet në Gjykatën Speciale në Hagë, duke pohuar se kjo çështje është diskutuar gjatë proceseve gjyqësore atje. “Disa nga përfaqësuesit e asaj rryme ideologjike sot ndodhen në Hagë, ku edhe kjo temë është trajtuar në proceset e Gjykatës Speciale. Disa dëshmitarë autoritativë kanë dëshmuar për veprime dhe kërcënime të ndryshme, përmes të cilave kërkohej largimi i fotografisë së Presidentit Rugova”, ka shkruar ai. Ish-veprimtari ka tërhequr vëmendjen ndaj asaj që e konsideron si rikthim të një ideologjie të kaluar, e cila sipas tij ka stimuluar ndarje dhe pakënaqësi në të kaluarën. “Të ringjallet sot ajo ideologji që mbolli urrejtje, përçarje dhe që lidhet me një periudhë të rëndë të vrasjeve politike, është më tepër se tendencioze dhe e papranueshme. E sidomos kur një nismë e tillë vjen nga një presidente, e cila duhet të përfaqësojë unitetin e popullit dhe të jetë mbi ndarjet politike. Kjo është shqetësuese dhe shokuese. Me këtë veprim, ju po tregoni se nuk po e përfaqësoni të gjithë popullin e Kosovës, por po identifikoheni me një vijë të caktuar politike, të lidhur me ideologjinë e kuqe, e cila, sipas qëndrimit tim, e futi Kosovën në një periudhë të rëndë të vëllavrasjes”, ka shtuar ai. Në fund të reagimit të tij, Tahiraj ka bërë të ditur qëndrimin e tij refuzues ndaj presidentes Shiroka-Pula, në rast se një nismë e tillë për largimin e simboleve do të gjejë zbatim.