Pas triumfit zgjedhor ndaj Vuçiqit, përfaqësuesit e Listës Studentore nisin vizitën e parë në Kosovë

Përfaqësuesit e lëvizjes opozitare serbe, të prirë nga kandidati i Listës Studentore, Fegja Dimoviq, dhe pesë kandidatë të tjerë, kanë realizuar një vizitë dyditore në Kosovë gjatë fundjavës së kaluar. Kjo ngjarje shënon daljen e tyre të parë në terren jashtë vendit pas suksesit të arritur në zgjedhjet e fundit në Serbi, ku arritën të sfidonin hapur pushtetin e Aleksandar Vuçiqit. Në një reagim të publikuar në rrjetin social Facebook, Dimoviq ka ndarë përshtypjet nga ky udhëtim, duke theksuar dimensionin e tij motivues dhe njerëzor. “Nga kjo vizitë kthehemi me forcën që do ta nevojitet për ta çliruar vendin tonë nga kthetrat e krimit të organizuar. Bashkëkombësve tanë në Kosovë u përcjellim një mesazh dashurie dhe solidariteti, me premtimin e qartë se nuk do t’i harrojmë kurrë”, ka shkruar ai. Ndërkohë, sa i takon pozicionimit politik ndaj Kosovës, nga radhët e Listës Studentore është bërë e ditur se veprimi i tyre do të orientohet në bazë të dispozitave të Kushtetutës së Serbisë, e cila e trajton vendin si pjesë të territorit të saj. Kjo qasje vjen pavarësisht faktit se Kosova shpalli pavarësinë në vitin 2008 dhe gëzon njohje të gjera ndërkombëtare.