Skenari i frikshëm i AfD-së në Gjermani: Gazetari Bahri Cani zbërthen planin për "remigracionin" dhe rrezikun për shqiptarët

Suksesi i fundit elektoral i partisë së ekstremit të djathtë, AfD, në zgjedhjet krahinore në Gjermani, ka ndezur dritat e kuqe të alarmit. Ky zhvillim ka krijuar një valë të madhe shqetësimi dhe pasigurie te komunitetet e huaja që jetojnë dhe punojnë në shtetin gjerman, ku bën pjesë edhe një numër i konsiderueshëm i shqiptarëve. Për të kuptuar më mirë se çfarë mund të ndodhë nëse ky subjekt politik merr frenat e pushtetit në nivel federal, gazetari i njohur i "Deutsche Welle", Bahri Cani, ka bërë një analizë të qartë të situatës dhe synimeve të kësaj partie. Sipas Canit, platforma e AfD-së bazohet në një qasje tejet agresive ndaj emigrantëve, të cilën ata e paketojnë nën termin "remigracion". Gazetari sqaron se, ndërsa riatdhesimi i personave pa dokumente të rregullta është një synim i zakonshëm për shumicën e forcave politike, rreziku real me AfD-në qëndron diku tjetër. "Ata vërtetë e kanë proklamuar një politikë shumë të vrazhdë ndaj të huajve. Pra, ata e quajnë remigracion. Fjala është fillimisht për largimin dhe rikthimin e të huajve që nuk kanë dokumentacion këtu, mirëpo këtë e do secila parti të them të drejtën. Problemi te AfD-ja është që ka thënë se duhet të largohen personat që kanë edhe shtetësi gjermane, në qoftë se kanë bërë ndonjë vepër kriminale", tha Cani. Ky diskurs i ashpër dhe zhvillimet e fundit politike kanë bërë që politika të mos jetë më një temë e largët për qytetarët. Cani shpjegon se këto tema tashmë kanë hyrë në çdo shtëpi, duke u kthyer në kryefjalë të diskutimeve të përditshme në tryezat e njerëzve, një fenomen ky që nuk ka qenë i pranishëm në këtë masë më parë.