Shtesat për bujqit: 30 shtatori dita e fundit për aplikim

Ministria e Bujqësisë, Pylltarisë dhe Ekonomisë së Ujërave të Republikës së Maqedonisë së Veriut ka njoftuar prodhuesit bujqësorë se data 30 shtator 2026 shënon afatin e fundit për aplikim për grante nga Programi i Mbështetjes Financiare në Bujqësi për vitin 2026. Aplikimet bëhen në rrugë elektronike, përmes platformës zyrtare të internetit të Agjencisë për Mbështetje Financiare në Bujqësi dhe Zhvillim Rural. Fermerët kanë mundësinë t'i plotësojnë vetë dokumentet ose të drejtohen për mbështetje teknike pranë zyrave rajonale të Ministrisë së Bujqësisë, Pylltarisë dhe Ekonomisë së Ujërave. Për të lehtësuar përdorimin e platformës digjitale dhe procesin e aplikimit, institucionet kanë publikuar Udhëzuesin zyrtar për Pagesat Direkte në Bujqësi për vitin 2026. Ky dokument përmban detaje mbi masat, kriteret, vlerën e subvencioneve, detyrimet e aplikantëve dhe udhëzimet hap pas hapi për ndjekjen e ecurisë së kërkesave. "Bujqit mund të dorëzojnë kërkesa për subvencione për vitin 2026 deri më 30 shtator. Udhëzuesi me masat, kushtet dhe procedurën e aplikimit është i disponueshëm në njoftim, ndërsa ndihmë mund të merret edhe në njësitë rajonale të Ministrisë së Bujqësisë, Pylltarisë dhe Ekonomisë së Ujërave", ka deklaruar ministri i MBPU-së, Borçe Serafimovski.