Mesazh i prerë nga Uashingtoni: Kuba nuk duhet të llogarisë në përfundimin e mandatit të Trump

Sekretari i Shtetit, Marco Rubio, i ka bërë thirrje Havanës zyrtare që të përzgjedhë një drejtim të ri veprimi, duke lëshuar njëkohësisht një paralajmërim të fortë se udhëheqësit që mendojnë se mund të fitojnë kohë deri në largimin e administratës së Presidentit Donald Trump do të ballafaqohen me pasojat nëse nuk ndryshojnë qasje. Nga ana e saj, administrata amerikane ka bërë të ditur qartazi më parë se synimi kryesor mbetet transformimi i sistemit komunist në pushtet në Kubë. Shtetet e Bashkuara kanë vënë në zbatim një bllokadë të naftës në fillim të këtij viti, e cila e ka futur shtetin ishullor në një krizë të thellë. Kjo situatë ka sjellë mungesa të theksuara të karburantit dhe ndërprerje të vazhdueshme të energjisë, të rënduara edhe më shumë nga gjendja e amortizuar e infrastrukturës. “Shpresojmë se Kuba do të orientohet drejt një rruge alternative”, u shpreh Rubio, duke shprehur dëshirën që individët që mbajnë frenat e pushtetit në Kubë të ballafaqohen me realitetin e vështirë aktual. “Fatkeqësisht, mjaft prej tyre vijojnë të përsërisin parulla revolucionare, duke besuar se mund ta kalojnë kohën e kësaj administrate pa ndërmarrë asnjë reformë apo ndryshim. Ata janë të gabuar dhe do ta kuptojnë të vërtetën në mënyrën më të ashpër nëse nuk heqin dorë nga ky kurs”, paralajmëroi tutje kryediplomati amerikan. Në krahun tjetër, gjatë fjalës së tij në Asamblenë e Përgjithshme të OKB-së të shtunën, ministri i Jashtëm i Kubës, Bruno Rodriguez, theksoi se vendi i tij mbetet i hapur për bisedime dhe dialog me Uashingtonin. Ndërkohë, gjatë fundjavës, Presidenti Trump parashikoi se dy vendet përfundimisht do të arrijnë një marrëveshje, duke shtuar se nuk e sheh të nevojshëm ndërhyrjen e ushtrisë. Uashingtoni e mban të izoluar Kubën përmes një embargoje për më shumë se gjashtë dekada, ndërsa administrata Trump e ka shtuar ndjeshëm presionin mbi Havanën pas ndërhyrjes ushtarake amerikane të muajit janar, e cila rezultoi me rrëzimin dhe kapjen e ish-presidentit të Venezuelës, Nicolas Maduro. “Atyve u duhen zgjedhje të lira dhe demokratike”, deklaroi Rubio lidhur me Venezuelën, duke shtuar se Uashingtoni është i angazhuar për të krijuar rrethanat e duhura për një proces të tillë zgjedhor sa më parë të jetë e mundur, pa dhënë megjithatë një afat kohor të përcaktuar.