Skandal në Serbi: Kryetari i Beogradit dyshohet se dhunoi këshilltaren lokale dhe i theu hundën

Kryetari i komunës së Beogradit, Aleksandar Shapiq, është vënë në qendër të një skandali të rëndë pasi dyshohet se ka sulmuar fizikisht këshilltaren lokale, Tanja Miqiq. Ngjarja ka ndodhur gjatë një incidenti të regjistruar në Novi Beograd, duke ngritur shqetësime të mëdha në opinionin publik. Sipas dëshmive dhe njoftimit zyrtar nga Lëvizja “Kreni-Promeni” (“Krijo Ndryshim”), ku Miqiq është anëtare, ajo ka pësuar thyerje të hundës pasi u vendos mes Shapiqit dhe bashkëshortit të saj gjatë një përplasjeje verbale dhe fizike. Në hapësirën mediatike janë publikuar edhe pamje filmike nga momenti i incidentit. Aty shihet qartë Shapiq duke u larguar, për t'u ndalur më pas dhe për t'i kthyer gjeste një burri që ndodhej pranë këshilltares. Këto pamje përkojnë me rrëfimin e Miqiqit, e cila pretendon se kreu i Beogradit e kishte ftuar bashkëshortin e saj drejt një zone të errët në rrugë për t'u përleshur fizikisht. Ajo ka treguar se përplasja ndodhi papritur, ndërsa po shëtiste qenin me bashkëshortin në lagjen e tyre. Fillimisht, Shapiq e kishte akuzuar atë se kishte dërguar persona për ta përgjuar apo protestuar para shtëpisë së tij. Tensioni u përshkallëzua në momentin kur ajo tentoi të përdorte telefonin për të regjistruar situatën. “Ai u nis ta mbrojë dhe unë u vendosa mes tyre. Ai më goditi në hundë, kështu që menjëherë më filloi gjakderdhja. Ma shtrembëroi hundën”, ka deklaruar Miqiq, duke shtuar se ajo do t'i nënshtrohej ekzaminimeve mjekësore për të dokumentuar lëndimet, përpara se të dorëzonte kallëzimin zyrtar në polici. Gjatë përplasjes, sipas të njëjtave burime, Shapiq ka lëshuar edhe kërcënime ndaj çiftit. Menjëherë pas kësaj, njësitë policore kanë mbërritur në vendngjarje, ndërsa në pamjet e siguruara shihet momenti kur Shapiq afrohet drejt një automjeti zyrtar të policisë. Në ato çaste, kreu i Lëvizjes “Kreni-Promeni”, Savo Manojlloviq, e ka pyetur drejtpërdrejt Shapiqin nëse kishte guxuar të godiste një grua. “Unë ta godas? Hajde, mos bëj teatër”, ka qenë reagimi i Shapiqit, para se të futej në veturën e policisë dhe të largohej nga vendi i ngjarjes. Pas shoqërimit, raportohet se Shapiq është liruar më vonë, ndërkohë që Lëvizja “Kreni-Promeni” ka kërkuar transparencë dhe emrin e prokurorit përgjegjës për këtë rast. Gazetarët kanë tentuar të marrin një prononcim nga vetë Shapiqi, i cili është përgjigjur në telefon, por ka ndërprerë lidhjen menjëherë sapo është pyetur për akuzat e ngritura ndaj tij. Deri në këto momente, institucionet kompetente dhe organet e rendit nuk kanë lëshuar ende një komunikatë zyrtare me detaje shtesë rreth rrethanave të plota të ngjarjes dhe hapave të mëtejshëm ligjorë.