Tenesi drejt një ekzekutimi historik: Christa Pike përballet me dënimin me vdekje pas 200 vitesh

Shteti i Tenesit pritet të zbatojë dënimin me vdekje ndaj Christa Pike këtë të mërkurë, pasi guvernatori Bill Lee hodhi poshtë kërkesën e saj për falje. Nëse ky vendim vihet në zbatim, Pike do të bëhet femra e parë në historinë dy-shekullore të këtij shteti që i nënshtrohet ekzekutimit. Sot 50 vjeçe, Pike u përfshi në një krim makabër në vitin 1995, kur ishte vetëm 18 vjeçe. Së bashku me të dashurin e saj 17-vjeçar, ajo vrau shoqen e tyre të klasës, 19-vjeçaren Colleen Slemmer, në ambientet e 'Knoxville Job Corps'. Ngjarja tronditi opinionin publik për shkak të egërsisë së krimit, moshës së re të autorëve, si dhe detajit rrëqethës të gdhendjes së një simboli satanik në trupin e viktimës. Pas dënimit për vrasje të shkallës së parë në vitin 1996, Pike hyri në historinë moderne të Shteteve të Bashkuara si gruaja më e re e dënuar me vdekje. Gjatë viteve të qëndrimit në burg, dosja e saj u pasurua me detaje tronditëse mbi të kaluarën e saj si viktimë e abuzimeve seksuale dhe betejave me shëndetin mendor, fakte që kanë nxitur reagime të forta nga organizatat ndërkombëtare. Në prag të datës së ekzekutimit, organizata si ACLU dhe Amnesty International kanë mobilizuar opinionin publik, duke i kërkuar guvernatorit ndërhyrje urgjente për ndryshimin e dënimit. Paralelisht, mbrojtja ligjore e 50-vjeçares i është drejtuar Gjykatës Supreme me kërkesën për pezullimin e procesit. Sipas të dhënave të Qendrës së Informacionit për Dënimin me Vdekje, hera e fundit që Tenesi ekzekutoi një grua ishte viti 1820, kur Martin Eve u dënua me varje për bashkëfajësi në vrasje. Rasti i Pike vjen në një periudhë kur debati për dënimin me vdekje të grave është riaktivizuar në nivel kombëtar, pas ekzekutimeve të bujshme të Lisa Montgomery nga qeveria federale në vitin 2021 dhe Amber McLaughlin në Misuri gjatë vitit 2023.