Përplasja në distancë: Saim Tahiraj i kërkon llogari Baton Haxhiut për takimet e diskutueshme gjatë luftës

Veprimtari i njohur i Lidhjes Demokratike të Kosovës (LDK), Saim Tahiraj, i është kundërpërgjigjur ashpër akuzave të vazhdueshme që Baton Haxhiu i ka drejtuar Presidentit historik, Ibrahim Rugova. Reagimi i tij ka ardhur përmes një postimi në rrjetet sociale. Në kundërpërgjigjen e tij, Tahiraj ia ka sjellë ndërmend Haxhiut kontaktet e tij të kaluara me zyrtarë të lartë të Shërbimit Sekret Serb gjatë periudhës së luftës në Kosovë, duke përmendur datat 13 dhe 14 nëntor 1997. “Më 13 ose 14 nëntor 1997, në Prishtinë, Baton Haxhiu takohet me zyrtarë të Shërbimit Sekret Serb. Në dhjetor të vitit 1997, në Brezovicë, takohet personalisht me Jovica Stanishiqin, ish-shefin e shërbimit sekret serb dhe një nga njerëzit më të afërt të Millosheviqit. Këto takime nuk janë thashetheme. Ato janë pjesë e dëshmisë së tij në Tribunalin e Hagës dhe e rrëfimeve të vetë Haxhiut”, ka shkruar Tahiraj. Më tej, aktivisti i LDK-së e ka ftuar Haxhiun që të sqarojë natyrën e këtyre kontakteve dhe prapaskenat politike që fshiheshin pas tyre, duke kërkuar qartësi për atë periudhë të ndjeshme. “Takimi me një përfaqësues të një shërbimi sekret nuk dëshmon vetvetiu bashkëpunim me atë shërbim. Por as nuk mund të fshihet apo të relativizohet një fakt i dokumentuar historik. Historia kërkon transparencë, përgjegjësi dhe të vërtetën, jo propagandë selektive”, ka përfunduar ai.