“Zgjedhje me zemër” – Enis Rexhepi tregon prapaskenat e bashkimit me Kombëtaren e Kosovës

Mesfushori Enis Rexhepi është një nga tre fytyrat e reja në listën e përzgjedhësit Franco Foda për ndeshjet e muajit nëntor, ku "Dardanët" do të përballen me Izraelin dhe Irlandën në kuadër të Ligës së Kombeve. Pas ardhjes së tij, talenti i ri është pritur në zyrat e Federatës së Futbollit të Kosovës nga presidenti i këtij institucioni, Agim Ademi. Gjatë prononcimit të tij të parë për faqen zyrtare të FFK-së, Rexhepi theksoi se vendimi për të përfaqësuar Kosovën ka qenë jashtëzakonisht i natyrshëm dhe pa asnjë dilemë. “Ka qenë shumë lehtë me vendos për Kosovën, se e kam vendosur me zemër”, u shpreh ai ndër të tjera. Futbollisti shtoi gjithashtu se lidhjet e ngushta me lojtarët e tjerë dardanë që aktivizohen në kampionatin gjerman kanë ndikuar pozitivisht në vendimin e tij, ndërsa ka shprehur admirim për projektin e federatës. “I kam edhe shokët që luajnë në Bundesligë në Gjermani, projekti shumë më pëlqen këtu”, tha ai. Në fund, Rexhepi ka vlerësuar lart cilësinë e grupit aktual dhe ka premtuar angazhim maksimal për të fituar një vend titullari në formacionin e Kosovës. “Kosova i ka lojtarët shumë të mirë, unë do ta jap maksimumin që të luaj si startues”, përfundoi mesfushori i ri.