Formë e jashtëzakonshme: Fisnik Asllani ndëshkon portierin gjerman dhe shkëlqen me gol e asistim

Sulmuesi i kombëtares së Kosovës, Fisnik Asllani, po kalon një periudhë fantastike, duke konfirmuar formën e lartë me një tjetër paraqitje mbresëlënëse në elitën e futbollit gjerman. Në kuadër të javës së nëntë të Bundesligës, skuadra e Hoffenheimit ka arritur të kalojë në epërsi 1:0 ndaj Schalke 04, falë një momenti vendimtar të sulmuesit kosovar. Ishte minuta e 10-të e takimit kur Asllani reagoi në mënyrë perfekte për të përfituar nga një pasiguri e portierit Loris Karius, duke e dërguar topin pa vështirësi në rrjetë dhe duke zhbllokuar shifrat. Spektakli i 21-vjeçarit nuk u ndal me kaq, pasi në minutën e 26-të ai u shndërrua në protagonist si asistues. Pas një depërtimi dhe një pasimi perfekt brenda zonës, ai gjeti Tim Lemperlen, i cili nuk gaboi nga afër, duke dyfishuar avantazhin e Hoffenheimit në 2:0. Me këto paraqitje, sulmuesi nga Kosova po vazhdon të dëshmojë rëndësinë e tij kyçe në formacionin e skuadrës gjermane, duke u shndërruar në një nga lojtarët më të komentuar të këtij sezoni. Vlen të theksohet se në këtë sfidë, në formacionin bazë të Hoffenheimit nga minuta e parë është aktivizuar edhe një tjetër talent shqiptar, Leon Avdullahu, i cili po vazhdon paraqitjet e tij të qëndrueshme.