Zelensky zbulon planin e ri të Rusisë: Mobilizim masiv dhe prania e trupave nga Koreja e Veriut

Presidenti i Ukrainës, Volodymyr Zelensky, ka bërë të ditur se Rusia ka aktivizuar një valë të re mobilizimi ushtarak, në përpjekje për të rritur kapacitetet e saj luftarake. Përmes një videomesazhi të publikuar mbrëmjen e sotme, kreu i shtetit ukrainas theksoi se, bazuar në të dhënat e siguruara nga shërbimet e sigurisë, Moska po synon të rekrutojë edhe shtetas të huaj për t'i dërguar në frontin e luftës. Këto deklarata vijnë pas një periudhe të gjatë spekulimesh në lidhje me një valë të re mobilizimi në Rusi, e cila shihet si një lëvizje e domosdoshme për të kompensuar humbjet e mëdha të pësuara në terren. Ndonëse presidenti rus, Vladimir Putin, ka hedhur poshtë në mënyrë kategorike mundësinë e një hapi të tillë, informacioni i inteligjencës ukrainase sugjeron të kundërtën. Zelensky u ndal gjithashtu te bashkëpunimi ushtarak mes Moskës dhe Phenianit, duke konfirmuar se aktualisht në territorin rus ndodhen mbi 8 mijë ushtarë nga Koreja e Veriut. Sipas presidentit ukrainas, autoritetet ruse po përgatisin terrenin për dërgimin e 10 mijë trupave të tjera koreano-veriore, të cilat janë aktualisht në fazën e përzgjedhjes dhe trajnimit. Në këmbim të kësaj mbështetjeje ushtarake, Rusia po ofron ndihmë teknologjike për Korenë e Veriut. Zelensky bëri të ditur se në vendin aziatik ka nisur tashmë prodhimi i dronëve sulmues të llojit “Shahed”, nën asistencën teknike të ekspertëve rusë. Presidenti ukrainas paralajmëroi se ky aleancë ushtarake midis dy vendeve nuk përbën kërcënim vetëm për Ukrainën, por ka potencialin të destabilizojë sigurinë në shkallë globale.