Homazhe në Prishtinë: Ramush Haradinaj nderon ushtarët britanikë dhe të rënët për liri

Kryetari i Aleancës për Ardhmërinë e Kosovës, Ramush Haradinaj, ka marrë pjesë në ceremoninë solemne përkujtimore të organizuar në sheshin “Edith Durham” në kryeqytet, për të përkujtuar ushtarët britanikë dhe të gjithë viktimat e konflikteve të kaluara. Nëpërmjet një publikimi në rrjetet sociale, Haradinaj njoftoi se ky tubim shërbeu si një mundësi ku qytetarët dhe udhëheqësit u bashkuan me partnerët strategjikë për të shënuar Aktin e Përkujtimit, ngjarje kjo që përkon me ditën kur Mbretëria e Bashkuar dhe shtetet e Commonwealth-it nderojnë kujtimin e heronjve të rënë që nga koha e Luftës së Parë Botërore. Me këtë rast, ai shprehu mirënjohjen e thellë për kontributin dhe vetëmohimin e ushtarakëve britanikë, duke veçuar me respekt të veçantë ata që dhanë jetën e tyre pikërisht në tokën e Kosovës.