Përplasjet në tubimin e së shtunës, Berisha: Provokatorët ishin të paguar dhe nuk kishin lidhje me studentët

Kryetari i Partisë Demokratike, Sali Berisha, ka thyer heshtjen pas incidenteve të ndodhura gjatë protestës së zhvilluar të shtunën para Ministrisë së Arsimit, ku pati përplasje mes protestuesve dhe anëtarëve të opozitës. Gjatë një komunikimi me qytetarët në rrjetet sociale, lideri i demokratëve ka deklaruar se tensionet dhe provokimet nuk janë shkaktuar nga studentët, por nga persona të paguar posaçërisht nga qeveria për të krijuar skena konflikti. “Siç e patë ju, asnjë incident nuk pati nga studentët. Zero incidente. Unë mund të them ty, i kam dhe emrat e tyre. Dhe mund t’ua them, por vetëm për hir të asaj që s’po më duket e drejtë se do ta marrin si një sulm të egër personal, por absolutisht ata ishin që të gjithë të paguar fort për të provokuar dhe për të krijuar incidente”, u shpreh Berisha. Më tej, ai theksoi se prania e kamerave të mediave pranë zonës së incidenteve ishte e dyshimtë dhe se mosha e personave në fjalë nuk përkon me atë të studentëve, duke shtuar se bëhet fjalë për individë të moshave 30 deri në 50 vjeç që shërbejnë si zjarrfikës profesionistë të opozitës. Duke folur për natyrën e protestës, Berisha theksoi se pjesëmarrja masive e qytetarëve dhe mbështetësve të Partisë Demokratike ka qenë e vazhdueshme që nga dita e parë e revoltës studentore, e thirrur fillimisht nga Sindikata e Pavarur e Arsimit të Lartë. Sipas tij, struktura ligjore e Partisë Demokratike i ka ofruar mbrojtje juridike më shumë se 600 studentëve përballë presioneve dhe policisë, ndërsa riafirmoi angazhimin e forcës politike që ai drejton për të vijuar mbështetjen e protestave. “Janë mbi 600 studentë, të cilët kanë marrë mbrojtje ligjore nga zyra jonë ligjore. Ndaj dhe ne jemi parti proteste. Kemi lindur në protestë dhe do të jemi në këtë protestë. Jo me simbolet tona, në respekt të studentëve dhe pluralitetit të tyre, por në mbështetje të plotë. Dhe unë ftoj edhe njëherë të gjitha forcat politike opozitare, të gjithë qytetarët, t’i mbështesim studentët”, përfundoi deklaratën e tij Sali Berisha.