A do të anulohet super-sfida Fury-Joshua? Flet drejtuesi i njohur

Përfoljet e fundit rreth një dëmtimi të mundshëm të Tyson Furyt kanë vënë në pikëpyetje megasfidën e shumëpritur kundër Anthony Joshuas, duke sjellë reagimin e menjëhershëm të kreut të UFC-së dhe Zuffa Boxing, Dana White. Dueli epik mes dy yjeve britanikë të peshave të rënda, i cili konsiderohet si një ndër ngjarjet më të mëdha në historinë e boksit në Britani të Madhe, është planifikuar të zhvillohet më 11 dhjetor në qytetin e Cardiff-it, duke qenë tashmë vetëm pak javë larg. Megjithatë, aludimet e ditëve të fundit nxitën frikën se Fury mund të tërhiqet për shkak të një problemi fizik. Zërat nisën pasi ish-kampioni i botës, Frank Bruno, bëri publike informacionet e marra nga rrethet e boksit, duke lënë të kuptohet se një lëndim i panjohur mund ta mbajë Furyn larg ringut. "E pashë atë ditë dhe mendoj se dikush në palestër më tha se ai ka një lëndim. Kjo mund ta pengojë të hyjë në ring kundër Anthony Joshuas. Dhe të kesh diçka të tillë në mendje nuk është aspak e këndshme", kishte deklaruar Bruno. Në këtë linjë, Dana White, i cili luan rolin e bashkëpromotorit të kësaj përballjeje, ka mohuar të ketë dijeni për një situatë të tillë, duke theksuar për Sky Sports se një lajm i tillë do të kishte mbërritur padyshim në tryezën e tij. “Është hera e parë që po e dëgjoj këtë. Do të doja të besoja se do ta dija nëse kjo do të ishte e vërtetë. Nuk e kam dëgjuar as thashethemin, e lëre më të di nëse është i vërtetë. E gjithë kjo është pjesë e atmosferës që krijohet sa më shumë i afrohemi ndeshjes. Shpresoj që ky lajm të mos jetë i vërtetë, por jam pothuajse i sigurt se do ta kisha dëgjuar deri tani”, u shpreh White. Ndonëse më vonë qarkulluan informacione se Fury mund të ketë vetëm një mavijosje në anën e majtë të fytyrës, një shqetësim i tillë nuk përbën arsye të mjaftueshme për dështimin e këtij eventi madhështor. Për momentin, përballja mes Tyson Fury dhe Anthony Joshua mbetet plotësisht në fuqi, ndërkohë që qetësimi i dhënë nga White ka shuar disi panikun e krijuar ndër adhuruesit e boksit rreth një anulimi të mundshëm.