Kryendeshja e La Ligës në “Metropolitano”: Simeone dhe Flick paralajmërojnë betejë të zjarrtë mes Atletico Madridit dhe Barcelonës

Kthesa e madhe e kësaj jave në elitën e futbollit spanjoll rezervon supersfidën mes Atletico Madridit dhe Barcelonës, e cila do të zhvillohet të dielën në stadiumin “Metropolitano”. Në konferencën për shtyp para këtij takimi vendimtar, numri një i stafit teknik të Atletico Madridit, Diego Simeone, ka thurur elozhe për kundërshtarin, duke e etiketuar katalanasit si ekipin më në formë të momentit. “Pa asnjë dyshim, përballë kemi skuadrën më të mirë. Mendoj se mbrojtësit tanë nuk kanë nevojë për motivim shtesë, pasi i gjithë ekipi duhet të jetë i përgatitur për t’u përballur me lojtarë si Lamine Yamal dhe Raphinha”, deklaroi Simeone. Në krahun tjetër, strategu i Barcelonës, Hansi Flick, ka shfaqur hapur ambiciet e tij për të dalë me triumf nga ky udhëtim tejet sfidues. Edhe pse e pranon se e pret një mision i ndërlikuar në kryeqytetin spanjoll, trajneri gjerman thekson se objektivi parësor mbetet arkëtimi i tri pikëve për të konsoliduar kreun e renditjes. “Besoj se do të kemi një ndeshje të vështirë, por dëshiroj tri pikët. Për Barcelonën do të ishte shumë e rëndësishme që pushimin për ndeshjet e kombëtareve ta presim si lider i kampionatit”, u shpreh Flick. Dueli i së dielës pritet të shërbejë si një provë e zjarrtë për ambiciet e të dyja ekipeve në luftën e ashpër për kreun e tabelës në La Liga.