Refuzimi bujshëm nga Deschamps mban Michael Carrick në krye të Manchester United

Edhe pse pritshmëritë ishin se “Djajtë e Kuq” do të prezantonin një trajner të ri gjatë kësaj fundjave dhe para ndërprerjes së kampionatit për shkak të ndeshjeve ndërkombëtare, në stadiumin “Old Trafford” situata mbetet e pandryshuar. Drejtimin e skuadrës vazhdon ta mbajë Michael Carrick, i cili vetëm pak ditë më parë regjistroi një fitore të rëndësishme në mesjavë kundër Romës në Ligën e Kampionëve. Sipas raportimeve nga mediat britanike, drejtuesit e klubit kishin shfaqur interes serioz për Didier Deschamps, i cili aktualisht është i lirë pas përfundimit të aventurës së tij në krye të kombëtares franceze. Megjithatë, strategu nga Hexagoni ka refuzuar mundësinë e marrjes drejtimit të gjigantit anglez, duke bërë që Carrick të vijojë detyrën e tij në stolin e nderit. I pyetur nga gazetarët për zërat e shumtë rreth të ardhmes së tij pas suksesit evropian, Carrick preferoi të qëndrojë me këmbë në tokë, duke mos u shpërqendruar nga spekulimet e merkatos dhe duke u fokusuar plotësisht te detyrat e fushës. “Nuk kam një top kristali për të parashikuar se çfarë do të ndodhë në të ardhmen. Aktualisht jemi të përqendruar te përgatitjet për sfidën e radhës këtë fundjavë. Na pret një ndeshje tejet e vështirë dhe e rëndësishme këtu kundër Aston Villas, ndaj dhe vëmendja jonë është vetëm te kjo përballje,” u shpreh Carrick.