Nga babai te djali: Zëvendëskomandanti në Drenas uron të birin për diplomimin në Policinë e Kosovës

Një ngjarje mbushur me krenari dhe emocione ka shënuar së fundmi familja Geci. Florent Geci ka përfunduar me sukses akademinë dhe është diplomuar në Policinë e Kosovës, duke hedhur kështu hapat e parë në karrierë dhe duke ndjekur gjurmët e të atit. Babai i tij, Florim Geci, mban detyrën e zëvendëskomandantit të Stacionit Policor në Drenas. Me rastin e këtij kapitulli të ri për të birin, zyrtari i lartë i policisë ka përcjellë një dedikim prekës, duke i vënë në dukje se ky profesion bart mbi supe histori, sakrifica dhe përgjegjësi të lartë ndaj vendit. "Uniforma do të thotë shumë, biri im. Uniforma është dëshmi e gjakut të derdhur ndër breza, është sakrifica e gjeneratave, është vuajtje e gjak, persekutim, dëbim e vrasje ndër shekuj", ka shkruar ndër të tjera Geci në mesazhin e tij. Më tej, ai ka vënë theksin te rëndësia e ruajtjes së imazhit dhe integritetit të këtij institucioni, duke kërkuar që kjo veshje zyrtare të vishet çdo ditë me përkushtim të palëkundur. "Uniforma nuk është vetëm veshje e thjeshtë, por është diçka e veçantë, e shenjtë, diçka që duhet të mbahet me nder e dinjitet, me përkushtim e krenari", ka shtuar ai. Në mbyllje të urimit të tij, zëvendëskomandanti i stacionit të Drenasit i ka dhënë kurajë Florentit dhe gjithë gjeneratës së re të policëve për rrugëtimin që sapo kanë nisur. "Uroj që ti e shumë kolegë tuaj t’i shërbeni vendit, qytetarit e mbi të gjitha Kosovës. Urime e suksese në të ardhmen", ka përfunduar Florim Geci. Kështu, prej kësaj dite, babë e bir janë të bashkuar jo vetëm nga lidhja familjare, por edhe nga misioni i përbashkët në mbrojtje të rendit, qytetarëve dhe Republikës së Kosovës.