Trump konfirmon operacionet ushtarake ndaj Iranit: Goditje kirurgjikale ndaj sistemeve të mbrojtjes

Presidenti i Shteteve të Bashkuara të Amerikës, Donald Trump, ka bërë të ditur se forcat ushtarake amerikane kanë ndërmarrë një operacion të shënjestruar në ishullin iranian Qeshm. Sipas kreut të Shtëpisë së Bardhë, ky veprim është ndërmarrë në një kohë kur Uashingtoni pretendon se ka arritur progres të konsiderueshëm në dialogun me Teheranin. Në një prononcim për mediat të premten nga West Palm Beach në Florida, Trump shpjegoi se bëhej fjalë për sulme të kufizuara, të fokusuara kryesisht në neutralizimin e infrastrukturës së mbrojtjes ajrore të Iranit. Ai e përshkroi operacionin si një ndërhyrje të shpejtë dhe efikase. “Kemi kryer goditje të vogla,” u shpreh presidenti amerikan para gazetarëve. “Ata kishin instaluar pajisje të mbrojtjes kundërajrore, të cilat ne i asgjësuam brenda një harku kohor prej pesë deri në pesëmbëdhjetë minutash.” Këto deklarata pasuan njoftimet e publikuara nga burimet zyrtare iraniane, të cilat raportuan për dy shpërthime raketash në zonën Suza të ishullit Qeshm. Ky lokacion është i pozicionuar në Ngushticën e Hormuzit, një pikë strategjike me rëndësi jetike për rrugët ndërkombëtare të transportit të naftës.