Instalacioni para Kryeministrisë shndërrohet në atraksion, Rama: Ja destinacioni i ri i Tiranës

Objekti artistik i njohur si “Sofra e gurtë”, i instaluar ditë më parë para godinës së Kryeministrisë si një gjest i qeverisë për të ftuar në dialog protestuesit, ka zgjuar kuriozitetin e kalimtarëve në kryeqytet. Tashmë, ky instalacion nuk po shërben vetëm si simbolikë politike, por është kthyer në një pikë ndalese për qytetarët që shfrytëzojnë rastin për të shkrepur fotografi. Kryeministri Edi Rama ka ndarë në rrjetet sociale pamje të qytetarëve pranë këtij objekti, duke e ironizuar dhe cilësuar atë si “destinacionin më të ri turistik të Tiranës”. Përmes një postimi në mëngjesin e sotëm, kreu i qeverisë ka shoqëruar fotografitë me një urim për një fundjavë të qetë për të gjithë ndjekësit e tij. Megjithatë, situata në terren mbetet e tensionuar. Pavarësisht përpjekjeve për dialog, organizatorët e protestave kanë refuzuar thirrjen e qeverisë dhe kanë konfirmuar mbajtjen e një proteste mbarëkombëtare sot, më 7 nëntor. Tubimi pritet të nisë në orën 14:00, me pikënisje para Ministrisë së Arsimit. Vala e protestave, e cila mori hov që prej 13 tetorit, ka përfshirë gjimnazistë, studentë dhe pedagogë. Lëvizja nisi fillimisht para Ministrisë së Arsimit, për t’u zgjeruar më pas në institucione të tjera kyçe, ku pjesëmarrësit kërkojnë reagim institucional dhe zgjidhje konkrete për problematikat e ngritura lidhur me politikat arsimore dhe qeverisëse.