Gjenerata e 63-të e Policisë së Kosovës betohet për rend dhe ligj, Sveçla: Uniforma është përgjegjësi, jo pushtet

Ministri i Punëve të Brendshme, Xhelal Sveçla, ka qenë i pranishëm në ceremoninë solemne të diplomimit të gjeneratës së 63-të të Policisë së Kosovës. Me këtë rast, ai vuri në pah peshën e madhe që bartin siguria dhe rendi publik në funksion të një shoqërie të drejtë dhe të qëndrueshme. Në fjalën e tij para të pranishmëve, ministri Sveçla nënvizoi se ruajtja e rendit është shtylla kryesore e besimit qytetar dhe garancia se ligji është i barabartë për këdo. Sipas tij, përpjekjet për të ndërtuar një shtet ku çdo banor ndihet i mbrojtur dhe i sigurt janë të pandalshme. “Siguria dhe rendi janë simbole të qetësisë sonë. Ato reflektojnë përpjekjen tonë të përbashkët për një vend ku ligji mbizotëron dhe ku çdo qytetar e gëzon ndjenjën e sigurisë dhe mbrojtjes”, u shpreh Sveçla, duke shtuar se drejtësia dhe barazia duhet të shndërrohen nga parime teorike në realitet të prekshëm për të gjithë. Duke e vlerësuar Policinë e Kosovës si institucion të pazëvendësueshëm, ministri theksoi se ky diplomim shënon një kapitull të ri për vendin, pasi radhëve të forcave të rendit po u shtohen kuadro të reja, të gatshme për t’iu përgjigjur sfidave të sigurisë. Duke iu drejtuar drejtpërdrejt kadetëve të rinj, ministri Sveçla u kujtoi atyre se misioni i tyre është në shërbim të Republikës së Kosovës. Ai potencoi se profesioni i policit kërkon një ndërthurje të disiplinës së lartë, guximit dhe përkushtimit të palëkundur, veçanërisht në ballafaqimin me situata komplekse. Në përmbyllje të mesazhit të tij, ministri dha një porosi të rëndësishme për gjeneratën e re: “Dua t’ju rikujtoj se uniforma që do të mbartni nuk është simbol i pushtetit mbi qytetarët, por i përgjegjësisë ndaj tyre”.