Siguria dhe bashkëpunimi rajonal, ministri Sveçla prezanton të arriturat e Kosovës në Forumin e Budvës

Ministri i Punëve të Brendshme, Xhelal Sveçla, ka marrë pjesë në punimet e Forumit Ministror BE–Ballkani Perëndimor për Punët e Brendshme, i cili u organizua në qytetin e Budvës në Mal të Zi, nën drejtimin e Presidencës irlandeze të Këshillit të Bashkimit Evropian. Gjatë diskutimeve në sesionet tematike, Sveçla vuri në pah angazhimin e palëkundur të Republikës së Kosovës drejt thellimit të bashkëpunimit rajonal dhe evropian. Ai veçoi luftimin e krimit në epokën digjitale, ngritjen e kapaciteteve hetimore dhe mbrojtjen e qytetarëve nga rreziqet kibernetike si prioritet kyç. Kreu i ministrisë së Brendshme bëri të ditur se institucionet e Kosovës po shënojnë vazhdimisht suksese të prekshme në sektorin e sigurisë, duke dhënë një kontribut të rëndësishëm jo vetëm në hapësirën rajonale, por edhe në atë evropiane. Sipas tij, këto arritje janë frymë e përkushtimit institucional, e integritetit profesional të strukturave tona të sigurisë dhe e partneritetit të ngushtë me aleatët ndërkombëtarë. Në kuadër të këtij takimi rajonal, Sveçla paraqiti gjithashtu hapat dhe përpjekjet e ndërmarra nga Kosova lidhur me menaxhimin e migracionit, çështjet e azilit dhe kontrollin e kufijve, duke i harmonizuar plotësisht me normat e Bashkimit Evropian. Në këtë kontekst, ai përmendi fazat përgatitore për hartimin e Strategjisë së Migrimit 2026–2030, si dhe përafrimin e legjislacionit tonë me Paktin e BE-së për Migracionin dhe Azilin.