Gërvalla në Budva: Ndryshimet në drejtësi dhe shteti i së drejtës, kyçe për rrugëtimin evropian të Kosovës

Ministrja e Drejtësisë, Donika Gërvalla, ka zhvilluar një takim zyrtar me komisionerin evropian për Demokraci, Drejtësi, Sundimin e Ligjit dhe Mbrojtjen e Konsumatorëve, Michael McGrath. Ky takim u realizua në kuadër të punimeve të Forumit Ministror BE–Ballkani Perëndimor për Drejtësi, i cili po zhvillohet në qytetin e Budvës në Malin e Zi. Sipas njoftimit të ministres, gjatë bisedës me zyrtarin e lartë evropian janë trajtuar prioritetet e institucioneve të Kosovës në sferën e drejtësisë, forcimi i sundimit të ligjit, bashkëpunimi i ngushtë me Bashkimin Evropian, si dhe hapat e ndërmarrë drejt anëtarësimit në familjen evropiane. “Folëm edhe për reformën në drejtësi, me theks të veçantë për themelimin dhe funksionalizimin e plotë të Byrosë Shtetërore, të cilën qytetarët tanë e presin me padurim prej kohësh, si garancë që pasuria e pajustifikueshme të mos fshihet pas pushtetit”, ka shkruar Gërvalla. Gjatë takimit, ajo vuri në dukje domosdoshmërinë e jetësimit të pakos së ligjeve që synojnë ndryshimin rrënjësor të sistemit gjyqësor në vend, duke e cilësuar këtë si një hap vendimtar për zhvillimin e institucioneve. “Theksova gjithashtu se pavarësia e gjyqësorit është themel i shtetit ligjor, por ajo nuk mund dhe nuk duhet të shërbejë si mburojë për askënd që përfshihet në krim dhe korrupsion”, ka deklaruar ministrja. Në fund, Gërvalla rikonfirmoi se transformimet rrënjësore në këtë sektor mbeten themelore për ndërtimin e një shteti funksional dhe demokratik. “Reformat në drejtësi janë parakusht për një shtet të fortë ligjor dhe funksional. Dhe, Kosova po i çon ato përpara me vendosmëri të palëkundur, duke forcuar mekanizmat e drejtësisë, luftuar në mënyrë efektive korrupsionin dhe krimin e organizuar dhe garantuar se rruga jonë drejt Bashkimit Evropian është e pakthyeshme”, ka shkruar Gërvalla.