Kurti u premcon mbështetje të palëkundur: Diplomon gjenerata e 63-të e Policisë së Kosovës

Përmes një ceremonie solemne është kurorëzuar përfundimi i trajnimit profesional për kadetët e rinj të gjeneratës së 63-të, të cilët zyrtarisht janë bërë pjesë e strukturave të Policisë së Kosovës. Ky organizim solemn është konsideruar si një moment tejet domethënës në karrierën e tyre të re, duke marrë mbi supe barrën e madhe të ruajtjes së rendit, garantimit të sigurisë publike dhe zbatimit të ligjit në të gjithë territorin e Republikës së Kosovës. Gjatë fjalës së saj, kryetarja e Kuvendit të Kosovës, Albulena Haxhiu, vuri në pah peshën historike të këtij institucioni dhe detyrimet që mbajnë efektivët e tij në shërbim të shtetit dhe qytetarëve. “Ju po hyni në një institucion që ka një vend të veçantë në historinë tonë të re. Policia e Kosovës u themelua në vitin 1999, menjëherë pas përfundimit të luftës, në kohën kur vendi ynë po niste ndërtimin e institucioneve të veta. Nga një shërbim policor i sapokrijuar, ajo u zhvillua në një institucion të rëndësishëm të Kosovës, duke marrë përsipër përgjegjësinë për rendin, sigurinë dhe më pas edhe për mbrojtjen e sovranitetit të vendit”, u shpreh Haxhiu. Ajo po ashtu bëri thirrje që të kujtohen me nderim e krenari të gjithë pjesëtarët e forcave policore që flanë jetën e tyre në krye të detyrës, duke veçuar emrat e Enver Zymberit dhe Afrim Bunjakut. Ndër të tjera, Haxhiu i porositi kadetët e rinj që të udhëhiqen nga parimet e guximit, integritetit dhe profesionalizmit të lartë gjatë ushtrimit të detyrës. “Guximi i një polici nuk dëshmohet vetëm në përballje me rrezikun. Guxim është edhe të veprosh drejt kur është më e lehtë të heshtësh, të mbrosh të dobëtin edhe kur përballë ke dikë të fuqishëm, si dhe të mbrosh ligjin edhe kur shkelja e tij vjen nga dikush që e njeh”, theksoi ajo. Kryetarja e Kuvendit veçoi faktin se në mesin e kësaj gjenerate të re figurojnë 118 vajza dhe gra, duke e cilësuar këtë si një arritje domethënëse për sigurinë në vend. “Ne mesin tuaj janë 118 vajza dhe gra. Dua t’ju përgëzoj për këtë zgjedhje. Prania e më shumë grave në institucionet e sigurisë është një zhvillim i rëndësishëm për vendin tonë. Derisa shumë gra po marrin përgjegjësi për sigurinë e të tjerëve, shumë gra të tjera vazhdojnë të jetojnë nën kërcënimin e dhunës, fatkeqësisht edhe brenda shtëpive të tyre. Për shumë prej tyre, vendimi për ta denoncuar dhunën vjen pas një historie të gjatë kërcënimesh, kontrolli dhe frike. Ato e dinë se ekspozimi mund t’i vërë përballë një rreziku edhe më të madh. Prandaj, kur një grua u drejtohet institucioneve, rreziku duhet të vlerësohet me seriozitet dhe masat për mbrojtjen e saj duhet të ndërmerren me kohë”, deklaroi Haxhiu. Në të njëjtën linjë u shpreh edhe kryeministri Albin Kurti, i cili e cilësoi si lajm tejet inkurajues përfshirjen e madhe të grave në këtë gjeneratë të re policore. “Në këtë Gjeneratë të 63-të po diplomoni gjithsej 397 kadetë, prej tyre 118 gra dhe 279 burra. Pra, pothuajse çdo i treti pjesëtar është grua. Është lajm i mirë që edhe në këtë gjeneratë gratë po diplomohen në numër të konsiderueshëm. Nga momenti i betimit, secili prej jush do të jetë i gatshëm të punojë në interes të shtetit”, tha ndër të tjera kreu i ekzekutivit.