Përplasje në Komisionin Hetimor: LVV kundërshton përfshirjen e Zyrës së Kryeministrit në hetimin për rastin e Arlinda Zekajt

Mbledhja e Komisionit Hetimor Parlamentar, i cili po shqyrton veprimet dhe mosveprimet institucionale lidhur me vrasjen e Arlinda Zekajt dhe trajtimin e dhunës në familje, është shoqëruar me tensione të larta. Shkak për këtë është bërë refuzimi i deputetëve të Lëvizjes Vetëvendosje për të përfshirë Zyrën e Kryeministrit në listën e institucioneve të cilave komisioni do t’u drejtojë kërkesa për dokumentacion dhe dëshmi. Kryetari i komisionit, Burim Ramadani, ka akuzuar përfaqësuesit e pushtetit për bllokim të procesit, duke pretenduar se ata janë paraqitur me qëndrime të parapërgatitura. Sipas Ramadanit, refuzimi për të kërkuar informacione nga Zyra e Kryeministrit po pengon zbardhjen e së vërtetës. Ai u ka bërë thirrje kolegëve të LVV-së që të reflektojnë deri në mbledhjen e radhës, duke theksuar se kërkesat për dokumente nuk nënkuptojnë domosdoshmërisht thirrjen e dëshmitarëve, por nevojën për qasje në prova. Deputetja e Partisë Demokratike të Kosovës, Besa Kabashi-Ramaj, e ka cilësuar si shqetësues faktin që komisioni po dështon të tejkalojë ndasitë politike për një kauzë të tillë kombëtare. Ajo nënvizoi se plani i propozuar synon të analizojë zinxhirin e përgjegjësisë, nga instancat më të ulëta deri te ato politike. Sipas saj, çdo institucion që ka dështuar në mbrojtjen e gruas, duhet të japë llogari, qoftë ajo penale apo morale. Nga ana tjetër, deputetja e Lidhjes Demokratike të Kosovës, Doarsa Kica-Xhelili, shprehu keqardhje për dinamikën e diskutimeve. Ajo sqaroi se kishte propozuar një qasje tjetër, duke kërkuar që hetimi të fokusohej fillimisht te komunat, Qendra për Punë Sociale dhe Policia, për të shmangur politizimin e menjëhershëm. Kica-Xhelili vlerësoi se barrikadimi ndaj emrit të kryeministrit shpërfaq qartë tensionet politike që po e pengojnë komisionin të kryejë punën e tij në mënyrë faktike dhe objektive.