Në krah të vajzës në Madrid / Bekim Haxhiu merr pjesë në ngjarjen evropiane dhe ndan mesazhin prekës për Heronën

Deputeti i Kuvendit të Kosovës, Bekim Haxhiu, i njohur gjerësisht si ‘Kamishi’, ka bërë të ditur pjesëmarrjen e tij në një ngjarje të rëndësishme profesionale në Madrid të Spanjës. Ai ndodhet atje së bashku me vajzën e tij, Heronën, ku po marrin pjesë në punimet e Kongresit të 6-të Evropian të Fizioterapisë. Përmes një publikimi plot emocione, ligjvënësi ka shprehur krenarinë e tij prindërore, duke e vlerësuar këtë bashkëudhëtim profesional me të bijën si një përvojë mjaft të veçantë. “Me Heronën, vajzën dhe kolegen time, në Madrid në Kongresin e 6-të Evropian të Fizioterapisë. Të ndash një përvojë të tillë profesionale me vajzën tënde është një kënaqësi e veçantë”, ka deklaruar Haxhiu. Në vijim të mesazhit të tij, ai ka nëvizuar se përparimi dhe arritjet e fëmijëve përbëjnë përmbushjen dhe lumturinë më të madhe për çdo prind. “Nuk ka kënaqësi më të madhe sesa t’i shohësh fëmijët duke ecur përpara, duke ndërtuar rrugën e tyre dhe duke arritur suksese me punën e tyre”, është shprehur ai. Në përmbyllje të reagimit të tij, deputeti ka përcjellë edhe një dedikim të ngrohtë e prindëror: “Krenar për ty, Herona!”.