Arsenal në ndjekje të Alex Baenës: Atletico Madridi vendos çmimin marramendës prej 80 milionë eurosh

Arsenali ka vënë në shënjestër Alex Baenën, talentin e Atletico Madridit, i cili shihet si përforcimi ideal për të kompletuar repartin e sulmit në krahun e majtë. Sipas informacioneve të fundit, klubi nga Londra është vënë seriozisht pas shërbimeve të 25-vjeçarit spanjoll, ndonëse për këtë transferim do të duhet të përballet me konkurrencën e fortë të Bayern Munichut. Drejtuesit e Atletico Madridit nuk kanë ndërmend ta lëshojnë lehtë lojtarin, i cili mbetet një element kyç në skemat taktike të trajnerit Diego Simeone. Për ta lënë të lirë spanjollin, klubi madrilen mësohet se kërkon një dëmshpërblim prej rreth 80 milionë eurosh. Për të siguruar fondet e nevojshme dhe për të balancuar bilancet financiare, Arsenali po shqyrton seriozisht mundësinë e largimit të mesfushorit Martín Zubimendi. Kjo lëvizje do t'i hapte rrugë investimit të konsiderueshëm për Baenën. Në ditët në vijim pritet të qartësohet nëse Mikel Arteta do të marrë guximin të shpenzojë këtë shumë të majme për lojtarin, i cili vazhdon të mbetet një ndër emrat më të lakuar në tregun evropian të transferimeve.