Alarm në Itali: Humben gjurmët e 24-vjeçarit nga Kosova, autoritetet nisin kërkimet intensive

Një operacion i gjerë kërkimi ka nisur në rajonin e Teramos në Itali, pas raportimit për zhdukjen e një 24-vjeçari me origjinë nga Kosova. Bëhet fjalë për Abdulla Canajn, i cili është parë për herë të fundit në zonën e Montorio al Vomano. Sipas informacioneve zyrtare, i riu është larguar nga banesa e tij vullnetarisht ditën e djeshme, rreth orës 15:00, dhe që nga ai moment familjarët nuk kanë pasur asnjë kontakt me të. Zhdukja e tij është denoncuar menjëherë në polici nga vëllai i tij. Abdulla Canaj, me origjinë nga fshati Lybeqev i Prizrenit, ka lindur në Itali dhe deri më tani nuk ka asnjë gjurmë të vendndodhjes së tij. Autoritetet italiane kanë mobilizuar forca të shumta për gjetjen e tij. Në terren janë angazhuar zjarrfikësit, karabinierët, Policia Lokale, si dhe ekipet e specializuara të Mbrojtjes Civile, të cilët po krehin zonën përreth. Për të lehtësuar identifikimin, policia ka bërë publike përshkrimin fizik të 24-vjeçarit: ai është 165 centimetra i gjatë, peshon 65 kilogramë, ka sy të kaltër dhe flokë të shkurtër me ngjyrë të zezë. Një shenjë dalluese e tij është një tatuazh në pjesën e pasme të qafës, ndërsa mban edhe mustaqe të holla. Në kohën kur është larguar nga shtëpia, Canaj kishte veshur një bluzë të bardhë me kapuç, pantallona me motive ushtarake, atlete dhe një kapelë të kuqe. Autoritetet komunale i kanë bërë thirrje publike qytetarëve që të bashkëpunojnë dhe të raportojnë çdo informacion që mund të ndihmojë në gjetjen e tij.