Tony Blair në një mision diplomatik në Izrael për të riaktivizuar planin e paqes në Gaza

Ish-kryeministri i Britanisë së Madhe, Tony Blair, ka zhvilluar një seri takimesh të nivelit të lartë me udhëheqësit izraelitë, përkatësisht kryeministrin Benjamin Netanyahu dhe presidentin Isaac Herzog. Këto konsultime vijnë në kuadër të iniciativës së mbështetur nga Uashingtoni për të rikthyer në tryezë planin e presidentit amerikan Donald Trump, që synon themelimin e një Bordi të Paqes për Rripin e Gazës. Axhenda diplomatike e Blair-it pritet të vijojë edhe ditën e premte, ku ai do të zhvillojë një takim me Gadi Eisenkot, figurë që po lakohet gjerësisht si një kandidat potencial për postin e kryeministrit të Izraelit në të ardhmen. Bordi në fjalë, i cili kishte shpallur një marrëveshje për “armëpushim” në tetor të vitit 2025, u konceptua fillimisht si një mekanizëm për të menaxhuar qeverisjen lokale, procesin e rindërtimit të zonave të shkatërruara nga konflikti dhe garantimin e stabilitetit afatgjatë në rajon. Megjithatë, funksionimi i këtij Bordi ka qenë mjaft i zbehtë, duke mos arritur të realizojë objektivat kryesore, e në veçanti vetë armëpushimin. Pengesat kryesore mbeten qëndrimi i Izraelit, i cili nuk ka dhënë dritën jeshile për instalimin e një administrate teknokratike në Gaza, si dhe vështirësitë e vazhdueshme në sigurimin e ndihmave humanitare për popullsinë civile palestineze.