Goditet banda kriminale në Athinë: 49-vjeçari shqiptar drejtonte sulmet me granata nga burgu

Autoritetet greke kanë shkatërruar një organizatë kriminale tejet të rrezikshme, e cila akuzohet për një sërë veprash penale, duke përfshirë zhvatjen, kërcënimet dhe sulmet e dhunshme me granata në kryeqytetin grek, Athinë. Në qendër të këtij grupi dyshohet se ndodhej një 49-vjeçar shqiptar, i cili, ndonëse ishte i dënuar për krime të rënda dhe po vuante dënimin në burgun e Trikalës, kishte arritur të mbante kontrollin e plotë mbi operacionet kriminale nga brenda qelisë. Nga pamjet filmike të siguruara gjatë hetimeve, shihen momente tronditëse të sulmeve ndaj bizneseve në Athinë. Në një rast specifik, dy persona shfaqen duke hedhur një granatë drejt një kafeneje ku ndodheshin klientë, përpara se të largoheshin me shpejtësi. Për fat të mirë, mjeti shpërthyes nuk ka detonuar, duke shmangur një tragjedi të mundshme. Sipas gjetjeve të policisë, 49-vjeçari mbante rolin e liderit, duke përpiluar listën e objektivave, analizuar të dhënat e siguruara nga bashkëpunëtorët dhe duke dhënë urdhrat për zbatimin e sulmeve. Rrjeti i tij shtrihej edhe në burgje të tjera, ku bashkëpunëtorë të tij, një shtetas rom në burgun e Malandrinos dhe dy shtetas egjiptianë në burgjet e Avlonës dhe Malandrinos, shërbenin si ndërmjetës për komunikimin me pjesëtarët e bandës që vepronin në liri. Grupi operonte me një strukturë të mirëorganizuar dhe hierarki të qartë. Anëtarët që ndodheshin jashtë sistemit të burgjeve kishin për detyrë identifikimin e bizneseve, vëzhgimin e tyre, mbledhjen e informacioneve dhe ekzekutimin e akteve të dhunshme, duke siguruar gjithashtu logjistikën për t'u larguar nga vendngjarja pa lënë gjurmë. Ky mekanizëm i sofistikuar u lejonte drejtuesve të bandës të ruanin ndikimin e tyre kriminal edhe pse ndodheshin prapa hekurave. Në kuadër të operacionit të gjerë policor, u kontrolluan katër biznese në qendër të Athinës, ku u verifikuan 50 persona dhe u prangosën 27 prej tyre.