Krizë dëmtimesh te Franca: Zidane në hall para sfidave me Italinë dhe Turqinë

Kombëtarja e Francës po vijon procesin stërvitor në prag të dy përballjeve vendimtare në Ligën e Kombeve kundër Italisë dhe Turqisë, megjithatë, trajneri Zinedine Zidane po përballet me një situatë kritike për shkak të numrit të lartë të lojtarëve të dëmtuar. Edhe pse “Gjelat” kryesojnë grupin me 10 pikë të grumbulluara, si rezultat i tri fitoreve dhe një barazimi, planet e stafit teknik janë komplikuar ndjeshëm nga mungesat e detyruara në organikë. Goditja më e fundit për kampin francez vjen nga Aurelien Tchouameni, i cili është detyruar ta braktisë grumbullimin për shkak të një shqetësimi fizik. Mesfushori i shtohet listës së gjatë të mungesave, ku bëjnë pjesë tashmë edhe Marcus Thuram e Pierre Kalulu. Për të mbuluar këto boshllëqe, Zidane ka ndërmarrë lëvizje të reja. Në vend të sulmuesit të Interit, është thirrur për herë të parë në skuadrën A 19-vjeçari i Bournemouth-it, Éli Junior Kroupi, ndërsa rolin e Kalulu do ta plotësojë 21-vjeçari i Wolfsburgut, Sael Kumbedi. Megjithatë, listës së mungesave nuk i ka ardhur fundi këtu. Përveç të lartpërmendurve, trajneri nuk mund të llogarisë as në shërbimet e emrave të rëndësishëm si Saliba, Koundé, Lacroix, Koné, Dembélé dhe Lepaul, duke e vënë në provë thellësinë e grupit të tij. Kjo situatë e vështirë e detyron Zidane të rishikojë strategjinë për ndeshjet e radhës: sfida ndaj Italisë që do të zhvillohet më 12 nëntor në “San Siro” dhe përballja me Turqinë, e planifikuar për datën 15 nëntor në Bordeaux.