“E ardhmja evropiane varet vetëm nga ne”, Rama shpall vlerësimin historik të Komisionit Evropian

Kryeministri Edi Rama ka deklaruar se progres-raporti i Bashkimit Evropian për Shqipërinë pasqyron qartë ecurinë pozitive të procesit të negociatave për anëtarësim. Gjatë një konference të përbashkët për shtyp me ambasadoren e BE-së në Tiranë, Sofia Moreira de Sousa, kreu i ekzekutivit shqiptar theksoi se dokumenti i fundit dëshmon se tashmë fati evropian i vendit tonë është ekskluzivisht në duart e veta. Duke iu drejtuar diplomates evropiane, kryeministri u shpreh se ky është vlerësimi më pozitiv që Shqipëria ka marrë ndonjëherë në historinë e raporteve të progresit. Ai shtoi se ndryshe nga e kaluara, kur diskutohej se çfarë pritej të ndodhte, dokumenti i publikuar nga Komisioni Evropian fokusohet te hapat konkretë që duhen hedhur në këtë fazë të procesit. “Shqipëria hyn në kilometrin e fundit të negociatave në BE. Ky kilometër ka 1000 metra për të përshkruar. Raporti tregon se krahasuar me një vit më parë, niveli i gatishmërisë së Shqipërisë është rritur dukshëm, evidenton përparim në disa fusha. KE vlerëson një progres të mirë të pushtetit gjyqësor, luftën kundër korrupsionit dhe SPAK ka dëshmuar pavarësi dhe të japë rezultate në misionin e tij”, nënvizoi Rama.