Lushaku: Raporti i Progresit dëshmon dështimin qeveritar dhe mungesën e reformave

Shefja e Grupit Parlamentar të Lidhjes Demokratike të Kosovës (LDK), Jehona Lushaku-Sadriu, ka adresuar kritika të ashpra ndaj Qeverisë së Kosovës, duke u bazuar në gjetjet e fundit të Raportit të Progresit të Komisionit Evropian. Ajo vlerëson se vendi po stagnon për shkak të shpërfilljes së reformave thelbësore nga ana e ekzekutivit. Gjatë prononcimit të saj për mediat në hollin e Kuvendit, Lushaku theksoi se Kosova vazhdon të përballet me sfida të njëjta, të cilat mbeten të pazgjidhura prej vitesh. Ajo veçoi si shqetësuese funksionimin joefektiv të sistemit gjyqësor, rritjen e rasteve të dhunës në familje dhe vrasjet e grave, duke i cilësuar këto si tregues të qartë të përkeqësimit të sigurisë në vend. Deputetja e LDK-së nuk la pa përmendur edhe gjendjen e rënduar ekonomike, duke nënvizuar se qytetarët po përballen me inflacion të lartë dhe vështirësi për të siguruar nevojat themelore. Sipas saj, edhe sektori i arsimit vuan nga mungesa e funksionalitetit, ndërsa reformat në të gjitha sferat e jetës shoqërore kanë ngecur për shkak të mosseriozitetit institucional. Lushaku shprehu zhgënjimin e saj për ritmin e ngadaltë të integrimit evropian, duke akuzuar Qeverinë aktuale se proceset e tilla nuk i ka në listën e prioriteteve. "Ne jo vetëm që jemi vendi i fundit në agjendat evropiane, por nuk po shënojmë përparim as si shtet. Kjo dëshmon se integrimi evropian nuk është qëllim parësor i kësaj qeverisjeje", deklaroi ajo.