​Malcolm Armstead shpallet MVP i javës në Superligën e Kosovës

Malcolm Armstead i Sigal Prishtinës është shpallur MVP i javës në ProCredit Superligën e Kosovës, pas paraqitjes së tij në fitoren ndaj Vëllaznimit. Amerikani ishte ndër protagonistët kryesorë të triumfit 83-71 në Gjakovë, duke realizuar 26 pikë, katër kërcime, tri asistime dhe tri topa të vjedhur, për një indeks prej 29. Armstead nuk është emër i ri për basketbollin kosovar. 36-vjeçari ka luajtur më herët për KB Pejën, ndërsa gjatë karrierës së tij në Kosovë ka veshur edhe fanellën e Golden Eagle Yllit. Në dhjetor të vitit 2023 ai iu bashkua Sigal Prishtinës, për t'u rikthyer tashmë te kryeqytetasit pas një periudhe tjetër jashtë klubit. Përveç Kosovës, Armstead ka një karrierë të gjatë në basketbollin evropian, me eksperienca në vende si Sllovenia, Rusia, Greqia dhe Turqia, ndërsa në vitin 2014 ishte shpallur edhe MVP i javës së parë të ABA League. Çmimi i kësaj jave vjen menjëherë pas një paraqitjeje vendimtare për Prishtinën, e cila me fitoren ndaj Vëllaznimit regjistroi triumfin e parë në kampionat këtë sezon.