Veprim i ri ushtarak: Pheniani provon raketa strategjike lundruese me municione thërrmuese

Koreja e Veriut ka ndërmarrë një provë të re me raketa strategjike lundruese, të pajisura me municione thërrmuese, njoftoi agjencia zyrtare e lajmeve KCNA. Lëshimi u krye ditën e hënë dhe shërbeu për të matur dhe rritur gatishmërinë ushtarake të vendit. Sipas agjencisë KCNA, ky testim ka mundësuar “përsosjen e aftësisë për të ndërmarrë një sulm vertikal ndaj një objektivi, duke çuar në një nivel më të lartë manovrimin gjatë fazës përfundimtare të fluturimit të raketës lundruese”. Në raportim theksohet gjithashtu se “koka luftarake me madhësi mesatare, e vendosur në një raketë lundrimi, ka kapacitetin që në fuqinë e saj maksimale të shkatërrojë plotësisht një sipërfaqe prej pesë deri në gjashtë hektarësh”. Një zyrtar i lartë nga Koreja e Veriut sqaroi se ky operacion u ndërmarrë me qëllim që “forcat tona të armatosura të mbrojnë sigurinë e vendit dhe të pengojnë çdo lloj kërcënimi”. Ndryshe nga armët balistike, testimet e raketave me kruiz nuk përfshihen në kuadrin e ndalesave ndërkombëtare për Phenianin. Nga ana e saj, Koreja e Jugut nuk dha ndonjë njoftim zyrtar për këto lëvizje ushtarake të fqinjit të saj as gjatë ditës së diel dhe as gjatë ditës së hënë. “Vendimi për të bërë publike ose jo këto zhvillime bazohet në një analizë të thelluar ushtarake, e cila merr parasysh mbrojtjen e aseteve, kapacitetet e mbikëqyrjes dhe zbulimit, sigurinë operacionale dhe elementë të tjerë”, deklaroi para gazetarëve të hënën Jang Do-yang, zëdhënës i Shtabit të Përbashkët të Ushtrisë së Koresë së Jugut. Ai shtoi gjithashtu se “forcat tona të armatosura nuk zgjedhin t'i bëjnë publike të gjitha lëshimet e ndërmarra nga Koreja e Veriut”. Kujtojmë se gjatë javëve të fundit, Koreja e Veriut ka intensifikuar provat e saj ushtarake, duke përfshirë sisteme të ndryshme si dronë nënujorë, raketa hipersonike dhe municione thërrmuese.