Tensionet në Ferrari, Vasseur shprtëhen pas incidentit mes Hamilton dhe Leclerc në Meksikë

Ndërkohë që e gjithë Italia feston suksesin e Kimi Antonellit, kampi i Ferrarit ndodhet nën alarm për shkak të situatës aktuale të skuadrës. Sfida e fundit e Formula 1 solli në pah edhe një herë fërkimet e brendshme mes Lewis Hamilton dhe Charles Leclerc, të cilët shfaqën mungesë tolerance ndaj njëri-tjetrit në pistë. Drejtuesi i ekipit, Frederic Vasseur, nuk i ka fshirë aspak pakënaqësitë e tij. Ai është shfaqur tejet i revoltuar pas garës në Meksikë, një reagim i ashpër ky që erdhi si pasojë e përplasjes mes dy pilotëve të tij në kthesën inauguruese të xhiros së parë, një gabim fatal që i heqi skuderiale mundësinë reale për të triumfuar. “Nga ana jonë, rezultati i sotëm është shumë i vështirë për t’u pranuar. Kemi punuar jashtëzakonisht shumë dhe, në garat e fundit, kemi bërë një hap të madh përpara sa i përket performancës së pastër. Në Meksikë grumbulluam më shumë pikë sesa rivalët tanë të drejtpërdrejtë”, u shpreh Vasseur. “Megjithatë, ishte një garë e vështirë dhe, duke marrë parasysh atë që ndodhi në xhiron e pare. Pres që ata të tregojnë më shumë respekt për markën, për skuadrën, për partnerët tanë dhe, mbi të gjitha, për dy mijë njerëzit që punojnë për ne në bazë”, shtoi më tej numri një i stendës italiane. Kreu i skuderiale vijoi me kritikat e tij: “Ata investojnë një përpjekje të jashtëzakonshme në punën e tyre, duke punuar ditë e natë në fabrikë për të përmirësuar makinën dhe për të sjellë risi në pistë. Për këtë arsye, të humbësh një fitore në këtë mënyrë është vërtet e vështirë për t’u pranuar”. “Ne ishim në vendin e parë dhe të dytë në kthesën e parë. Kur gjendesh në një pozicion të tillë, duhet ta shfrytëzosh mundësinë sa më mirë. Do të diskutojmë brenda skuadrës se çfarë ndodhi dhe do të sigurohemi që gjithçka të jetë e qartë për të ardhmen. Tani nisemi drejt São Paulo, ku do të synojmë fitoren”, përfundoi ai.