Trump paralajmëron marrëveshje të mundshme me Teheranin, çmimet e naftës shënojnë rënie

Kreu i Shtëpisë së Bardhë, Donald Trump, ka dhënë sinjale se një marrëveshje me Iranin është e arritshme, duke sjellë një kthesë domethënëse në qasjen diplomatike mes Uashingtonit dhe Teheranit, në prag të zgjedhjeve të mesmandatit në SHBA. Përmes një postimi në rrjetin e tij social Truth Social, presidenti amerikan vuri inatin e çmimeve të naftës në lidhje të drejtpërdrejtë me shpresat për shmangien e një konflikti të ri ushtarak në Lindjen e Mesme. “Çmimet e naftës po bien ndjeshëm sepse njerëzit mendojnë se nuk do të ketë luftë me Iranin. Irani dëshiron të arrijë një zgjidhje sa më shpejt të jetë e mundur. Mund të ndodhë!”, theksoi kreu i shtetit amerikan. Kjo deklaratë pason tonet e ashpra të përdorura nga Trump gjatë fundjavës, kur ai kishte paralajmëruar se ishte i gatshëm t’i jepte Iranit një “goditje shkatërruese” dhe kishte lënë të kuptohej se objektiva bërthamorë iranianë mbeteshin në shënjestër të Uashingtonit. Edhe zëvendëspresidenti amerikan, J.D. Vance, u shpreh mjaft optimist rreth ecurisë së kontakteve diplomatike. Ai bëri të ditur se administrata ka shënuar përparim në përpjekjet për një zgjidhje të negociuar me Teheranin dhe se dialogu do të vijojë. Nga ana tjetër, autoritetet iraniane kanë konfirmuar zhvillimin e bisedimeve intensive indirekte me Shtetet e Bashkuara, me synim frenimin e përshkallëzimit ushtarak dhe arritjen e paqes në rajon. Ministri i Jashtëm i Iranit, Abbas Araqchi, sqaroi se konsultimet diplomatike po zhvillohen në një ritëm tejet intensiv për shkak të ndjeshmërisë së lartë të rrethanave aktuale. Ndërkohë, presidenti iranian Masoud Pezeshkian bëri me dije se Udhëheqësi Suprem Mojtaba Khamenei i ka dhënë qeverisë kompetenca shtesë për t'i dhënë vrull negociatave. Në kuadrin e këtyre lëvizjeve, Teherani shprehu gatishmërinë për të përshpejtuar hapjen e Ngushticës së Hormuzit, një arterie kyçe për tregtinë ndërkombëtare të naftës. Si shenjë e “vullnetit të mirë” në tryezën e bisedimeve, afati i planifikuar u shkurtua nga shtatë në vetëm dy ditë. Megjithatë, ky hap vjen me kushte të rënda nga ana iraniane, që kërkon një armëpushim të plotë në të gjitha frontet rajonale, heqjen e sanksioneve energjetike, çlirimin e fondeve të bllokuara jashtë vendit dhe ndalimin e bllokadës detare amerikane ndaj porteve të vendit. Pavarësisht hapësirës për dialog, klima mbetet e tensionuar. Uashingtoni dhe Izraeli vazhdojnë të mbajnë në tryezë mundësinë e operacioneve ushtarake kundër Iranit, ndërsa Teherani është kundërpërgjigjur se çdo sulm do të marrë një përgjigje pa “kufizime gjeografike”. Sipas mediave amerikane, gjatë diskutimeve të fundit mes Trump dhe kryeministrit izraelit Benjamin Netanyahu, ky i fundit ka insistuar në ruajtjen e presionit ushtarak pas zgjedhjeve në SHBA, ndërsa Trump ka parapëlqyer t'i japë përparësi zgjidhjeve përmes rrugëve diplomatike.