Nisja e rrugëtimit drejt Euro 2028: Tahirukaj tregon sfidat e Kombëtares së Kosovës në hendboll

Drilon Tahirukaj, një nga shtyllat kryesore të Kombëtares së Kosovës në hendboll, mbart mbi supe një eksperiencë të pasur nga cikle të ndryshme kualifikuese. Ai është plotësisht i ndërgjegjshëm për peshën e sfidave që e presin Përfaqësuesen në startin e fushatës eliminatore për Kampionatin Evropian 2028. Të mërkurën në mbrëmje, "Dardanët" do të zbarkojnë në fushën e Ishujve Faroe për ndeshjen e parë, kurse të dielën do të jenë nikoqirë të Hungarisë në qytetin e Ferizajit. Hungaria konsiderohet si favoriti kryesor i Grupit 4, ku bën pjesë gjithashtu edhe Mali i Zi. "Në Ishujt Faroe na pret ndeshje mjaft e vështirë. Kemi përballë një Kombëtare të talentuar dhe sigurisht na pret një ambient i jashtëzakonshëm, një palestër e mbushur me shikuesit fanatikë vendas. E dimë se çfarë lojtarësh ka në Kombëtaren e Ishujve Faroe dhe ku luajnë ata," u shpreh Tahirukaj, i cili prej vitesh luan suksesshëm në Zvicër, ngjashëm me disa prej bashkëkombësve të tij në ekip. Duke folur me optimizëm të matur, ai shtoi: "Por do të shkojmë të përqendruar dhe do të japim gjithçka nga vetja. Mbetet të shihet çka do të ndodhë në fund." Në anën tjetër, përballja me hungarezët paraqet një nga provat më të vështira që ka parë ndonjëherë parketi kosovar, duke qenë se bëhet fjalë për njërën ndër Përfaqësueset më cilësore në arenën ndërkombëtare. "Të dielën ndoshta do të jetë përballë një ndër kundërshtarët më të fortë që kemi pasur ndonjëherë. Por luajmë para tifozëve tanë. Në Ferizaj presim të kemi një ambient impozant. Urojmë në përkrahje të madhe që të bëjmë ndonjë befasi," përfundoi deklaratën e tij Drilon Tahirukaj.