Politologu Altin Gjeta ka deklaruar se, megjithëse emërimi i Kaja Kallasit në krye të diplomacisë së Bashkimit Evropian dhe përfshirja e diplomatit Peter Sorensen në procesin e dialogut Kosovë–Serbi sjellin një frymë të re, pritshmëritë për rezultate të prekshme mbeten të ulëta. “Kallas ka treguar një qasje më pozitive ndaj Kosovës dhe ka deklaruar se dialogu duhet të rikalibrohet, pasi deri tani nuk ka prodhuar rezultate konkrete”, ka thënë Gjeta në “Interaktiv”. Sipas tij, pavarësisht vullnetit të mirë, hapësira e veprimit e Kallasit mbetet e kufizuar për shkak të ndikimit të interesave të shteteve anëtare të BE-së. Sipas Gjetës, përfshirja e Peter Sorensen, një diplomat që e njeh mirë realitetin në Kosovë, është një përparësi, por nuk mjafton për të ndryshuar rrënjësisht ecurinë e procesit të dialogut. “Këta dy komponentë sjellin ajër të ri në dialog, megjithatë duhet të presim dhe të shohim konkretisht se si do t’i qasen këtij procesi”, theksoi ai. Gjeta theksoi se është e pamundur që BE-ja të heqë dorë nga marrëveshjet tashmë të nënshkruara mes Kosovës dhe Serbisë, për shkak të investimit politik që ka bërë në to. Ai pret që Brukseli të fokusohet më shumë në riformatimin e dialogut në aspektin procedural dhe diplomatik, sesa në përmbajtje. “Nëse BE-ja synon të rikuperojë kredibilitetin e humbur në Prishtinë, duhet të ndërmarrë hapa konkretë – siç është heqja e sanksioneve ndaj Kosovës – dhe të mos perceptohet më si një ndërmjetës i zhbalancuar”, përfundoi Gjeta. Kallasi gjatë kësaj jave pritet ta vizitojë Kosovën.