Pas vendimit të 16 shtatorit, Fatmir Limaj nis turin e takimeve nga Ferizaji dhe Kaçaniku

Kryetari i Nismës Socialdemokrate, Fatmir Limaj, ka inicuar një seri takimesh me strukturat partiake, aktivistët dhe qytetarët, nënn sloganin “Kosova pas aktgjykimit të 16 shtatorit”. Stacionet e para të këtij cikli bisedimesh ishin qytetet e Kaçanikut dhe Ferizajit, ku u analizua gjendja aktuale politike dhe sfidat komplekse me të cilat po ballafaqohet vendi. Përmes një adresimi publik, Limaj theksoi se gjatë këtyre tubimeve janë ngritur shqetësime madhore që kanë të bëjnë me ruajtjen e dinjitetit të luftës së Ushtrisë Çlirimtare të Kosovës (UÇK), rrethanat e miratimit të Ligjit për Dhomat e Specializuara, krizën ekonomike, çështjen e sigurisë, si dhe rëndimin e situatës sociale dhe rritjen e dukurive të dhunës në shoqëri. Sipas kreut të Nismës, qytetarët kanë shprehur hapur shqetësimin dhe zhgënjimin e tyre lidhur me procedimin dhe kthimin e Ligjit për Dhomat e Specializuara në Kuvend, duke kërkuar llogaridhënie dhe transparencë të plotë. Limaj ka vlerësuar se Kosova ka hyrë në një fazë tjetër pas datës 16 shtator, duke shtuar se vendimi i Hagës nuk përbën vetëm një çështje individuale të atyre që po gjykohen, por ka lënë pasoja të thella në shtet, duke prekur dinjitetin e luftës çlirimtare dhe ndjenjën e drejtësisë. Ai ritheksoi se lufta e UÇK-së ishte e drejtë dhe për liri, e vërtetë kjo që nuk mund të cenohet nga asnjë vendim gjyqësor. Turi i këtyre takimeve do të shtrihet në të gjitha komunat e vendit për të bashkëbiseduar nga afër me qytetarët dhe mbështetësit ratiakë rreth pritshmërive dhe brengave të tyre. Në përmbyllje, kreu i Nismës Socialdemokrate ka bërë thirrje për përgjegjësi më të madhe institucionale, vendosmëri dhe veprim konkret përballë sfidave aktuale, duke kërkuar që institucionet e vendit të veprojnë në përputhje të plotë me interesat e shtetit dhe qytetarëve.