Haxhiu bën thirrje për ulje të tensioneve në Shqipëri: Të ndalet dhuna dhe të dëgjohen studentët

Kryetarja e Kuvendit, Albulena Haxhiu, ka bërë thirrje për frenimin e menjëhershëm të dhunës gjatë protestave në Shqipëri, duke kërkuar njëkohësisht reflektim dhe trajtim serioz të kërkesave të studentëve. Duke e cilësuar protestën si një të drejtë themelore demokratike, ajo ka theksuar se institucionet përgjegjëse duhet të ulen në tryezën e dialogut me protestuesit për të shqyrtuar çështjet e ngritura prej tyre. “Nuk është e lehtë me parë dhunën as kundrejt protestuesve dhe as kundrejt policëve të cilët janë të uniformuar. Prandaj edhe kemi kërkuar që dhuna të ndalet nga të dyja palët dhe të dëgjohen kërkesat e studentëve”, u shpreh Haxhiu. Gjatë prononcimit të saj, ajo ka hedhur poshtë kategorikisht çdo aludim se Lëvizja Vetëvendosje ka pasur rol organizativ apo ka nxitur qytetarët e Kosovës që t'i bashkohen tubimeve në Shqipëri. “Asnjëherë Lëvizja Vetëvendosje nuk ka bërë thirrje as publike e as jopublike që të marrin pjesë qytetarët e Kosovës në këto protesta. Prandaj nuk mund të mbahet përgjegjëse Vetëvendosja”, shtoi ajo. Në fund, Haxhiu ka tërhequr vërejtjen se pretendimet e pabazuara rreth përfshirjes së partisë së saj mund të dëmtojnë marrëdhëniet dypalëshe mes Kosovës dhe Shqipërisë. Ajo nënvizoi se çdo ngjarje në Shqipëri përcillet me ndjeshmëri në Kosovë, duke shprehur gatishmërinë e plotë për të kontribuar në qetësimin e situatës.