Rrjeti i fshehtë i Ergys Agasit: Nga zyrtarët e lartë te prokurorët dhe figurat e medias në dosjet e SPAK

Detaje të reja kanë dalë në dritë nga materialet audio dhe video të sekuestruara nga SPAK në zyrën e Ergys Agasit. Regjistrimet, të cilat vetë Agasi i kishte instaluar në ambientet e tij të punës, zbulojnë një plejadë figurash publike, politikanësh dhe përfaqësuesish të sistemit të drejtësisë që kanë frekuentuar atë që përflitet si një 'zyrë me ndikim të lartë'. Mes personazheve që shfaqen në këto pamje është edhe influencierja Hatixhe Brika (Hati), e njohur për stilin e saj luksoz të jetesës, burimi i të ardhurave të së cilës ka qenë shpesh objekt dyshimesh. Një nga gjetjet më shqetësuese lidhet me verën e vitit 2025, kur një prokuror i SPAK, i specializuar në dosjet e krimit të organizuar, është filmuar në shoqërinë e Agasit në zonën e Palasës. Hetuesit po verifikojnë nëse ky takim ka shërbyer për rrjedhje informacionesh konfidenciale apo nëse prokurori ka qenë subjekt i ndonjë forme shantazhi. Gjithashtu, në këto materiale figuron edhe një gjyqtare e GJKKO-së, prania e së cilës thuhet se ka krijuar situata delikate për prokurorin e çështjes, Altin Dumani. Në listën e personave që kanë pasur kontakte me Agasin bën pjesë edhe gjyqtarja I.R. Në të njëjtën periudhë verore, në Palasë është filmuar edhe gazetari Elvi Fundo. Pamjet shfaqin një takim mjaft miqësor mes tij dhe Agasit, pavarësisht fushatave të mëparshme kritike të gazetarit ndaj këtij të fundit. Sipas burimeve, gjatë bisedave të tyre, Fundo është mburrur për ndikimin që pretendonte se kishte mbi prokurorët Altin Dumani dhe Ols Dado. Zyra e Agasit në ish-Bllok ka shërbyer si një qendër graviteti për elitën politike dhe administrative. Në video shfaqen ish-drejtuesja e SHISH, Vlora Hyseni, ish-drejtorja e AKSHI-t, Mirlinda Karçanaj, si dhe zyrtarë të tjerë të lartë. Po ashtu, janë identifikuar dy zonja të njohura të Partisë Demokratike, ku njëra prej tyre është filmuar teksa kryqëzohet në derën e zyrës me analistin Çim Peka. Ky i fundit, sipas informacioneve, ka luajtur rolin e ndërmjetësit mes Shkëlzen Berishës dhe Ergys Agasit. Ndikimi i Agasit shtrihej edhe në strukturat e rendit. Ish-drejtori i Policisë, Ilir Proda, raportohet se ka pasur komunikime sistematike me të. Ndërkohë, biznesmeni L.L. i është drejtuar Agasit për të zhbllokuar investimet e tij në jug të vendit, një përpjekje që për pak sa nuk i kushtoi humbjen e aseteve që zotëronte. Një tjetër konflikt i hapur është ai me Klod Allajbeun, i cili e akuzon Agasin për tjetërsim pronash në Hipotekë. Tensionet mes tyre kanë shkuar deri në kërcënime, duke e bërë çështjen e 'EQUOS Resort' një pikë të nxehtë konflikti. Ergys Agasi, përmes këtyre manovrave, kishte ndërtuar një profil të ngjashëm me atë të 'Rasputinit', duke u shndërruar në një figurë kyçe që ndërhynte për të zgjidhur probleme karriere, biznesi apo edhe çështje personale, duke ushtruar një ndikim të pashpjegueshëm në korridoret e pushtetit të Edi Ramës.