Sfida e madhe në Spanjë: Bayerni kërkon pikë në Madrid mes mungesave të rënda

Gjiganti gjerman Bayern Munich ka zbritur gjatë ditës së hënë në tokën spanjolle, ku e pret një duel i zjarrtë ndaj Atletico Madridit. Takimi i vlefshëm për xhiron e katërt të fazës së grupeve në Ligën e Kampionëve është programuar të luhet të martën, duke nisur nga ora 21:00. Skuadra nga Munichu do të duhet të bëjë llogaritë pa disa prej lojtarëve kyç, veçanërisht në fazën e sulmit, pasi Luis Díaz, Jamal Musiala, Ismael Saibari dhe Serge Gnabry nuk kanë udhëtuar me ekipin dhe kanë mbetur në Gjermani për shkak të dëmtimeve. Pavarësisht këtyre mungesave, stafit teknik i kanë ardhur dy lajme të mira. Portieri me përvojë, Manuel Neuer, dhe sulmuesi Michael Olise – i cili ishte tërhequr si masë paraprake në sfidën e fundjavës ndaj Borussia Dortmundit në “Allianz Arena” – figurojnë rregullisht në listën e futbollistëve të grumbulluar. Nën urdhrat e trajnerit për këtë transfertë delikate ndaj skuadrës së drejtuar nga Diego Simeone janë vënë gjithsej 19 lojtarë, ku përfshihen edhe tre gardianë të portës.