Ngjarje e tmerrshme në Afrikën e Jugut: Torturohet brutalisht blegtori dhe i pritet veshët gjatë grabitjes

Autoritetet policore në Afrikën e Jugut kanë vënë në pranga pesë persona, të cilët dyshohen se janë autorët e një sulmi tejet mizor ndaj blegtorit Donovan Marx. Gjatë këtij akti kriminal, i dëmtuari u dhunua fizikisht, u godit me thikë e armë zjarri, si dhe iu nënshtrua torturave gjatë një grabitjeje të dhunshme. Incidenti i rëndë ndodhi të mërkurën e kaluar në pronën e 50-vjeçarit Marx, e cila ndodhet në Ventersdorp, brenda provincës së Veriperëndimit. Gjatë kësaj ngjarjeje makabre, keqbërësit i prenë atij veshët. Sipas të dhënave zyrtare të policisë, një grup personash të armatosur dhe me fytyra të mbuluara iu afruan fillimisht një prej punëtorëve që po kulloste barin në afërsi të banesës së Marx. Pasi e pyetën për vendndodhjen e pronarit, ata e lidhën atë këmbë e duar. Në momentin që blegtori u kthye në pronën e tij, dy prej sulmuesit e pritën dhe e plagosën me armë zjarri në pjesën e sipërme të trupit, për ta futur më pas zvarrë brenda shtëpisë, ku e lidhën dhe e goditën me thikë. Pasi shkatërruan e kontrolluan ambientet e banesës, autorët arritën të grabitnin tri armë zjarri nga kasaforta dhe u arratisën duke përdorur furgonin e viktimës. Pak kohë më vonë, punëtori i lidhur arriti të shkëputej dhe të njoftonte për ndihmë, çka bëri që Marx të transportohej me urgjencë drejt spitalit, ku aktualisht vijon të jetë nën kujdesin mjekësor. Burimet pranë spitaleve bëjnë me dije se ekipi kirurgjikal e pati të pamundur t'i shpëtonte veshët e blegtorit dhe se me mundësi të larta atij do i duhet të mbajë proteza në të ardhmen. Ky akt kriminal ka marrë edhe reagimin institucional nga Ministri i Bujqësisë i Afrikës së Jugut, Willie Aucamp, i cili e ka cilësuar ngjarjen si të papranueshme, duke shtuar se në vend nuk mund të ketë hapësirë për sjellje kaq barbare dhe të pakuptimta. Ndërkohë, pesë personat e ndaluar si të dyshuar, mosha e të cilëve lëviz nga 26 deri në 56 vjeç, pritet të paraqiten para trupit gjykues ditën e nesërme.