Tabaku jep alarmin për ekonominë: Paratë e paligjshme po fitojnë terren, bujqësia dhe prodhimi drejt greminës

Deputetja e Partisë Demokratike, Jorida Tabaku, ka drejtuar kritika të ashpra ndaj qeverisë për qasjen e saj ndaj ekonomisë, duke hedhur dyshime të forta mbi bazat e vërteta të rritjes ekonomike në vend. Gjatë fjalës së saj në seancat për buxhetin dhe paketën fiskale, ajo theksoi se modeli aktual ekonomik po mbështetet në mënyrë të rrezikshme te sektori i ndërtimit, ndërkohë që shtyllat jetike si bujqësia dhe prodhimi vendas po vuajnë një tkurrje alarmante. Sipas saj, ky zhvillim dëshmon për një ekonomi me themele të dobëta, e cila rrezikon të prodhojë kriza të rënda në të ardhmen. Një tjetër pikë kyçe e denoncimit të deputetes demokratike ishte fenomeni i pastrimit të parave, ku sektori i ndërtimit po shërbehet si kanal kryesor, i shoqëruar nga një nivel i lartë i informalitetit që dëmton tregun e lirë. Në vijim të fjalës së saj, Tabaku kërkoi llogaridhënie nga ekzekutivi lidhur me ndryshimet e propozuara në taksa, duke përfshirë modifikimet në TVSH, uljen e kufirit për biznesin e vogël, si dhe dyfishimin e taksës mbi dividendin nga 8% në 15%. Ajo u ndal gjithashtu te rënia drastike e eksporteve bujqësore dhe prodhuese, duke ia fajësuar këtë situatë mungesës totale të nxitjeve dhe mbështetjes institucionale për këto fusha.