Stabilitet energjetik: Rikthehet në rrjet njësia A3 e KEK-ut pas remontit vjetor

Korporata Energjetike e Kosovës (KEK) ka njoftuar zyrtarisht se njësia A3 ka përfunduar me sukses të gjitha proceset e startimit, pas përmbylljes së punimeve të planifikuara në kuadër të remontit vjetor. Sipas njoftimit të kësaj korporate, njësia në fjalë është sinkronizuar tashmë me rrjetin elektrik dhe ka rifilluar prodhimin e rregullt të energjisë. Aktualisht, gjendja operative e kësaj njësie vlerësohet si stabile, ndërsa të gjithë parametrat teknikë po funksionojnë konform vlerave të parapara. Nëpërmjet një deklarate për media, KEK-u ka shprehur mirënjohjen e thellë për punonjësit dhe ekipet teknike të angazhuara në këtë proces. Korporata ka vlerësuar lart përkushtimin dhe profesionalizmin e dëshmuar nga personeli, të cilët mundësuan që aktivitetet e planifikuara të përfundojnë me sukses dhe të sigurohet rikthimi i shpejtë i njësisë A3 në funksion të plotë.