Hëna në shënjestër: NASA i jep gas misionit historik për rikthimin e amerikanëve deri në vitin 2028!

Agjencia hapësinore amerikane është duke intensifikuar përgatitjet për t'i kthyer sërish njerëzit në satelitin tonë natyror, me planin madhështor që brenda një kohe të shkurtër të nisë edhe ngritjen e një stacioni të përhershëm atje. Kreu i agjencisë, Jared Isaacman, ka rikonfirmuar synimet e guximshme për zbarkimin e astronautëve në Hënë gjatë vitit 2028, çka i bie të ndodhë para se të myllet mandati i presidentit të Shteteve të Bashkuara, Donald Trump. Në një fjalim të mbajtur në Qendrën Hapësinore Kennedy, Isaacman bëri me dije se NASA ka për qëllim që në verën e vitit 2027 të nisë fluturimin e misionit Artemis III. Ky udhëzim nuk do të sjellë zbarkim të ekuipazhit në tokën hënore, por do të shërbejë ekskluzivisht për të provuar bashkimin e anijes kozmike me modulet e uljes në orbitën e Tokës. Këto mjete të avancuara po prodhohen nga korporatat e njohura SpaceX, e cila drejtohet nga Elon Musk, dhe Blue Origin, në pronësi të Jeff Bezos. Megjithatë, vendimi përfundimtar se cila prej këtyre dy kompanive do të sigurojë kontratën përfundimtare për zbarkimin ende nuk është zyrtarizuar nga NASA. Në krahun tjetër, misioni Artemis IV, i cili është përcaktuar të ndodhë në vitin 2028, pritet të shënojë hapin e madh të rikthimit të njerëzve në sipërfaqen hënore pas më shumë se 50 vitesh. Astronautët parashikohet të kalojnë rreth një javë të plotë në Hënë, ku do të zhvillojnë eksperimente dhe hulumtime të ndryshme shkencore. Sipas raportimeve, Isaacman theksoi se agjencia po bën çmos për të përshpejtuar hapat operacionalë. Megjithatë, kjo dinamikë e lartë ka ngritur dilema te ekspertët se mos vallë nxitimi mund të cenojë testet teknike dhe sigurinë e vetë astronautëve. Nga ana e tij, administratori u shpreh se triumfi i NASA-s nuk do të varet nga risitë teknologjike apo mënyrat moderne të administrimit, por nga trashëgimia dhe eksperienca e gjatë e institucionit. Ai solli në vëmendje programin legjendar Apollo, përmes të cilit u arrit kalimi nga fluturimi i Apollo 7 te zbarkimi madhështor i Apollo 11 në Hënë për vetëm nëntë muaj. Pavarësisht kësaj, sfidat që presin janë të papara më parë. NASA synon ngritjen e një baze afër polit jugor të Hënës, një territor i pashkelur nga misionet e kaluara Apollo, të cilat u ulën vetëm pranë ekuatorit hënor. Një tjetër pikëpyetje mbetet raketa Starship e SpaceX, e cila është përzgjedhur nga NASA për të ndihmuar në procesin e zbarkimit. Edhe pse kjo raketë ka mbyllur me sukses orbitën e saj të parë rreth Tokës, një provë fluturimi u ndërpre në minutat e fundit për shkak të një defekti në motor. Kompania e Elon Musk duhet të vërtetojë se Starship ofron siguri maksimale për misionet e ardhshme, si dhe të dëshmojë aftësi të tjera kyçe, siç është furnizimi me lëndë djegëse në hapësirë. “Është një objektiv jashtëzakonisht ambicioz”, u shpreh astronauti i NASA-s, Frank Rubio, i caktuar për të qenë pjesë e misionit Artemis III. Pavarësisht sfidave, ai shfaqi besim të plotë te potenciali amerikan, duke shtuar: “Një gjë që gjithmonë e kam besuar dhe mësuar është se nuk duhet të vësh bast kundër Amerikës.”