Trazirat në kryeqytet: Arrestohet shtetasi amerikan me origjinë sllave, dyshohet se hodhi molotovë gjatë protestës

Autoritetet policore në Tiranë kanë vënë në pranga gjashtë persona, mes të cilëve edhe një shtetas amerikan me origjinë sllave, si të dyshuar kryesorë për aktet e dhunës dhe përplasjet e regjistruara gjatë protestës së zhvilluar të shtunën në kryeqytet. Sipas informacioneve zyrtare, bëhet fjalë për Kevin Radosevich, me origjinë nga Kalifornia, i cili është kapur pasi kamerat dhe provat e siguruara e tregojnë atë duke shpërndarë dhe hedhur mjete shpërthyese të tipit koktej molotov në drejtim të turmës dhe forcave të rendit. Ky është rasti i dytë brenda dhjetë ditëve të fundit që një shtetas amerikan bie në prangat e policisë shqiptare në rrethana të ngjashme. Gjatë tubimit të djeshëm, situata ka eskaluar në përleshje të dhunshme, ku protestuesit kanë sulmuar punonjësit e policisë duke përdorur sende të forta, lëndë piroteknike, bomba molotov, si dhe sfera e vida metalike për të dëmtuar efektivët dhe pronën publike. Përveç gjashtë të arrestuarve, policia ka bërë të mundur nisjen e procedimeve penale në gjendje të lirë për tre persona të tjerë, ndërkohë që vijojnë kërkimet intensive për kapjen e dy personave të tjerë të shpallur në kërkim në lidhje me të njëjtat ngjarje.