Nga dy dekada e gjysmë studime te ndërtimtaria në Gjermani: Historia e dhimbshme e Drilon Gashit

Pasi ka investuar rreth 25 vjet të jetës së tij në studimin e teologjisë, filozofisë dhe shkencave humane, duke shërbyer gjithashtu si imam dhe këshilltar i kryekuvendarit, Drilon Gashi është detyruar të largohet nga Kosova për të nisur një jetë të re në Gjermani. Në moshën 39-vjeçare, Gashi tregon se tani siguron ekzistencën në kantieret e ndërtimit në Gjermani, ku merret me shtrimin e pllakave dhe punë të rënda fizike. Sipas tij, ky hap erdhi pas një serie dështimesh për t'u punësuar në vendlindje, pavarësisht se kishte dërguar afër 60 aplikime në institucione dhe kompani të ndryshme. Përmes një rrëfimi të ndarë me ndjekësit në rrjetet sociale, ai ka pasqyruar zhgënjimin e tij të thellë me tregun e punës dhe kushtet socio-ekonomike në Kosovë, duke përmendur sfidat e të qenit baba i katër fëmijëve me kredi bankare dhe detyrime të shumta familjare. "Me katër fëmijë, me detyrime bankare dhe përgjegjësi familjare, erdhi një ditë kur nuk mund të prisja më. Mora rrugën e mërgimit. Dhe këtu, mes pluhurit, çimentos dhe lodhjes fizike, më është kthyer vazhdimisht një pyetje: A thua çfarë duhet të bëjë më shumë një qytetar që të ketë mundësi të jetojë me dinjitet në vendin e vet?", ka shprehur ai ndër të tjera. Gashi ka theksuar se nuk ndjehet i turpëruar nga puna e ndershme në ndërtimtari, por ngre alarmin për një realitet ku qytetarët e kualifikuar mbesin pa perspektivë dhe detyrohen të ndajnë familjet e tyre për shkak të mbijetesës ekonomike, duke u bërë thirrje institucioneve dhe qeverive që të reflektojnë mbi përgjegjësinë e tyre ndaj mirëqenies së qytetarëve.