Tragjedia në Gjilan: Arrestohet 65-vjeçari pas vrasjes së djalit dhe mbesës së tij

Një ngjarje e rëndë ka tronditur fshatin Demiraj të Gjilanit, ku autoritetet kanë vënë në pranga një 65-vjeçar, i cili dyshohet se është përfshirë në vrasjen e dyfishtë të ndodhur të dielën. Viktima të këtij krimi makabër kanë mbetur djali i tij 27-vjeçar dhe mbesa e tij ende foshnjë. Zëdhënësi i Policisë për Rajonin e Gjilanit, Ismet Hashani, ka konfirmuar për redaksinë tonë se i ndaluari është babai i viktimës së re. Sipas informacioneve të para nga hetimet, dyshohet se krimi ka ndodhur në rrethana familjare, ndërsa Prokuroria e ka klasifikuar rastin si “Vrasje e rëndë”. Me vendim të prokurorit, 65-vjeçarit i është caktuar masa e ndalimit policor për 48 orë. Ngjarja tronditëse u zbulua më 1 nëntor, rreth orës 08:47, kur Policia u njoftua për gjetjen e dy trupave të pajetë brenda një shtëpie në Demiraj. Menjëherë pas marrjes së informacionit, njësitet përkatëse policore, së bashku me prokurorin e shtetit dhe ekipet e emergjencës mjekësore, dolën në vendin e ngjarjes, ku u konstatua vdekja e dy personave. Trupat e pajetë janë dërguar në Institutin e Mjekësisë Ligjore për t'iu nënshtruar autopsisë, ndërsa autoritetet janë duke zhvilluar hetime intensive në koordinim të plotë për të zbardhur motivet dhe rrethanat e plota të kësaj tragjedie. Burime të ndryshme kanë bërë të ditur se personi i arrestuar është Brahim Demiri, gjyshi i foshnjës dhe babai i 27-vjeçarit të ndjerë.