Përshkallëzim i dhunshëm: Sulmet ruse lënë pa energji katër rajone ukrainase, Moska raporton për mbi 100 dronë të neutralizuar

Moska zyrtare njoftoi se më shumë se 100 dronë u asgjësuan gjatë një operacioni ajror gjatë natës në rajonin e Nizhni Novgorodit, më 1 nëntor. Në krahun tjetër, kreu i shtetit ukrainas, Volodymyr Zelensky, hodhi akuza të rënda ndaj Kremlinit për goditjen e objekteve jetësore në katër rajone të Ukrainës, duke zhytur qindra mijëra banorë në errësirë. Ky zhvillim nga pala ruse u regjistrua më pak se 24 orë pasi forcat e armatosura të Ukrainës pohuan se kishin vënë në shënjestër Kombinatin Kamenski, një ndërmarrje shtetërore e industrisë kimike dhe të mbrojtjes në rajonin e Rostovit. Zelenskyy po më 1 nëntor konfirmoi se ky sulm kishte shkaktuar dëme materiale që kapin vlerën e dhjetëra miliona dollarëve. Gleb Nikitin, guvernatori i rajonit rus të Nizhni Novgorodit, bëri të ditur se një strukturë industriale në distriktin Kstovo u godit nga një sulm i gjerë me dronë në datën 1 nëntor, duke pësuar dëmtime të konsiderueshme. Sipas raportimeve të mediave ukrainase, shënjestër e këtij sulmi ishin rafineria e kompanisë Lukoil në Kstovo, si dhe termocentrali i kombinuar për prodhimin e energjisë dhe ngrohjes në Novogorkovskaia. Guvernatori Nikitin theksoi se gjatë ofensivës së natës u rrëzuan mbi 100 dronë, ndërkohë që deri në atë moment nuk kishte raporte për humbje njerëzore. Presidenti Zelensky deklaroi se gjatë natës së 1 nëntorit, trupat ruse shënjestruan rrjetin energjetik në katër rajone ukrainase, duke lënë pa rrymë një masë të madhe qytetarësh. “Vetëm përgjatë kësaj nate, sektori ynë energjetik në katër rajone u vu nën sulmet ruse: Dnipro, Vinitsia, Zhitomir dhe Hmelnitski. Bëhet fjalë për nënstacione, transformatorë dhe linja të energjisë elektrike që furnizojnë me rrymë shtëpitë e qytetarëve tanë”, shkroi ai në rrjetin Telegram. “Grupet e terrenit për riparim po angazhohen pa ndërprerje. Deri në këto momente, qindra mijëra familje vazhdojnë të mbeten pa furnizim me energji elektrike”, shtoi ai. Lideri ukrainas vuri në dukje gjithashtu se vetëm gjatë kësaj jave forcat ruse lëshuan në drejtim të Ukrainës 1.940 dronë luftarakë, mbi 1.580 bomba të drejtuara nga ajri dhe 44 raketa të kategorive të ndryshme, nga të cilat 36 ishin balistike. “Intensiteti i sulmeve është jashtëzakonisht i lartë dhe rusët po përpiqen të përfitojnë maksimalisht nga boshllëku i sistemeve tona të mbrojtjes kundër raketa-balistike”, shtoi ai. Në një komunikatë zyrtare, ushtria ukrainase bëri të ditur se forcat e Moskës ndërmorën një sulm me 433 dronë më 1 nëntor. Sipas këtij burimi, mjetet fluturuese pa pilot u nisën nga Orioli dhe Shatalovo në Rusi, si dhe nga zona e Donjeckut e cila ndodhet nënn pushtimin rus. Deri në atë orë nuk ishin regjistruar viktima. Sistemet e mbrojtjes ajrore të Ukrainës arritën të neutralizojnë 371 prej këtyre dronëve rusë, konfirmoi ushtria. Moska i ka shtuar ndjeshëm sulmet ndaj zonave të banuara dhe rrjetit elektroenergetik të Ukrainës në prag të stinës së dimrit. Si kundërpërgjigje, Kievi po fokusohet te goditja e infrastrukturës ruse të naftës dhe gazit. Më 31 tetor, ushtria ukrainase deklaroi se kishte goditur me dronë dhe sisteme raketore Kombinatin Kamenski, uzinën shtetërore kimike dhe ushtarake në rajonin e Rostovit. Ajo bëri me dije se ishte konfirmuar “shpërthimi i zjarrit në një magazinë të produkteve të gatshme”, ndërsa u dëmtuan katër reparte prodhimi. Sipas ushtrisë ukrainase, ky kompleks prodhon lëndë djegëse të ngurtë për raketa, e cila shërben për municionet e disa sistemeve raketore ruse. Duke e vlerësuar këtë zhvillim, Zelensky përgëzoi forcat e armatosura për ato që i quajti “sanksione me rreze të gjatë veprimi” në rajonin e Rostovit. Rajoni i Rostovit, që kufizohet drejtpërdrejt me Ukrainën, përbën një nyje kyçe industriale dhe logjistike me rëndësi të lartë strategjike në jugperëndim të Federatës Ruse.